BREAKING NEWS
१० श्रावण २०७८, आईतवार

भक्तपुरको अरनिको राजमार्ग क्षेत्रमा ६४ वटा आधुनिक सिसिटिभी जडान

एक्सन खबर
भक्तपुरको अरनिको राजमार्ग क्षेत्रमा ६४ वटा आधुनिक सिसिटिभी जडान

भक्तपुर । भक्तपुरको अरनिको राजमार्गका विभिन्न स्थानहरूमा सिसिटिभी जडान गरिएको छ । महानगरीय प्रहरी कार्यालय रानीपोखरीका प्रमुख प्रहरी अतिरिक्त महानिरीक्षक हरि बहादुर पालले शुक्रबार महानगरीय प्रहरी परिसर भक्तपुरमा आयोजित एक कार्यक्रम बिच भक्तपुर क्षेत्रमा जडान गरिएका ६४ वटा आधुनिक सिसिटिभी क्यामेराको उद्‍घाटन गरे ।

भक्तपुरस्थित अरनिको राजमार्गमा पर्ने जडीबुटीदेखि पलासेसम्मको सडक खण्ड र महानगरीय प्रहरी परिसर भक्तपुर लगायतका स्थानहरूमा स्थानीय तह, विभिन्न बैंक तथा वित्तिय संस्था र उद्योगी व्यवसायीहरूको सहयोगमा उक्त सिसिटिभी जडान गरिएको हो ।

सो अवसरमा उनले समाजमा शान्ति सुरक्षा र अमनचयन कायम राख्न सिसिटिभीले ठूलो सहयोग पुर्‍याउने चर्चा गर्दै आगामी दिनमा समेत यस्ता कार्यहरूलाई निरन्तरता दिनुपर्ने बताए । कुनै पनि घटनाको सफल अनुसन्धानका लागि सिसिटिभी क्यामेराले सहजता प्रदान गर्ने बताउँदै पालले सिसिटिभी जडान कार्यमा सहयोग गर्नेहरू प्रति धन्यवाद पनि दिए ।

कार्यक्रमका विशेष अतिथि भक्तपुर जिल्लाका प्रमुख जिल्ला अधिकारी प्रेम प्रसाद भट्टराईले समाजमा लगानी गरेको कुरा कुनै समयमा पनि नष्ट नहुने भएकाले सिसिटिभी जडानमा आर्थिक सहयोग पुर्‍याउने दाताहरूलाई धन्यवाद दिए । सिसिटिभीले अपराधीलाई निरुत्साहित बनाउन सहयोग पुग्ने पनि बताए ।

भक्तपुर जिल्ला सिसिटिभी जडान समितिका संयोजक तथा कार्यक्रमका अध्यक्ष प्रदिप श्रेष्ठले पनि सबैलाइ धन्यवाद दिए । सो अवसरमा सो अवसरमा प्रहरी अतिरिक्त महानिरीक्षक पालले सिसिटिभी क्यामेरा जडान गर्न सहयोग गर्ने दाताहरू, जडान समितिका पदाधिकारीहरू, पूर्व प्रहरी उपरीक्षक ध्रुब रत्न हाडा तथा प्रहरी कर्मचारीहरूलाई कदरपत्र तथा प्रशंसापत्र प्रदान गरेका छन्।

कार्यक्रममा प्राईम कमर्सियल बैंक लिमिटेडका जनरल म्यानेजर संजिव मानन्धर, भक्तपुर जिल्ला पत्रकार महासंघका अध्यक्ष जगत प्रजापती, सिसिटिभी क्यामेरा जडान समितिका ईन्जिनियर मेनसन लाखेमरू, जडान समितिका कोषाध्यक्ष नविन प्रजापति लगायतले मन्तव्य राखेका थिए ।

- १९ असार २०७८, शनिबार १७:०९ मा प्रकाशित



Kumari Advertisement
top ad