BREAKING NEWS
८ कार्तिक २०७८, सोमबार

केएमसीमा सफलतापूर्वक गरियो १४ दिनको नवजात शिशुको जटिल शल्यक्रिया

एक्सन खबर
केएमसीमा सफलतापूर्वक गरियो १४ दिनको नवजात शिशुको जटिल शल्यक्रिया

काठमाडौं, २३ असोज । काठमाडौंको सिनामंगलस्थित काठमाडौं मेडिकल कलेजमा १४ दिनको नवजात शिशुको जटिल एवं दुर्लभ शल्यक्रिया सफलतापूर्वक गरिएको छ । बच्चामा जन्मजात देखिएको जटिल एवं दुर्लभ मानिने कनजेनिटल डायफ्रामाटिक हर्नियाको शल्यक्रिया सफलतापूर्वक गरिएको हो ।

सिनामंगल गैरीगाउँका सरस्वती तामाङको कोखबाट जन्मिएको बच्चामा जन्मजात यस्तो हर्निया देखिएको थियो । चिकित्सकहरुका अनुसार बच्चाको पेट र छातीको बिचमा हुँने डायफ्राम मांसपेशीमा प्वाल थियो । पेट र छातीलाई छुट्याउँने पत्र (डायफ्राम) मा प्वाल परेका कारण पेट भित्र रहनुपर्ने कलेजो, आन्द्रा, आमाशय र फियो छातिमा पुगेको थियो । जसका कारण बच्चालाई श्वास फेर्न गाह्रो भएको थियो । सामान्यतया ३७ हप्तामा बच्चा जन्मिने भएपनि सरस्वतीले ३५ हप्तामै छोरालाई जन्मदिएकी थिइन् ।

थापाथली अस्पतालमा नर्मल डेलिभरी भएको सो बच्चालाई रेफर गरेर केएमसी ल्याइयो । केएमसीका बाल तथा नवजात शिशु सर्जन डा.आशिस लाल श्रेष्ठ नेतृत्वको चिकित्सकहरुको टोलीले बच्चाको सफलतापूर्वक शल्यक्रिया गरेको हो । ‘डायफ्राम प्वाल परेर छातिमा पुगेको कलेजो, आन्द्रा, आमाशय र फियोलाई शल्यक्रिया गरी पेटमा ल्याई प्वाल टालेका छौं,’ डा.श्रेष्ठले भने, ‘यो निकै जटिल र दुर्लभ समस्या हो । अप्रेशन सफल भयो, अहिले बच्चाको स्वास्थ्य अवस्था राम्रो छ ।’

समय नपुगी जन्मिएको बच्चा, आमाको दुध भन्दा अन्य कुरा खुवाउँदा समस्या हुँने र बेहोस पर्दा होस खुल्न गाह्रो हुँने जस्ता करणले यस्तो शल्यक्रिया निकै जटिल हुँने डा.श्रेष्ठ बताउँछन् । उनी भन्छन् ‘एक त यो निकै जटिल अप्रेशन हो, केएमसीमा हामीले पहिलो पटक यस्तो अप्रेशन गरेका हौं । त्यसमाथि ५ हजार ज्यूँदो बच्चा जन्मिदा सरदर एक जनामा मात्र यस्तो हर्निया देखिने हुँनाले यो दुर्लभ केस हो ।’

यस्तो समस्या हुँदा विकर्सित हुँदै गएको फोक्सोको विकास क्रमलाई रोक्ने र श्वास फेर्न गाह्रो भएर बच्चाको ज्यान जाने जोखिम हुँने चिकित्सकहरुको भनाई छ । तर, अप्रेशन सफल भएर जोखिम टरेपछि विरामीका आफन्त हर्षित छन् ।

जटिल अवस्थामा पुगेको बच्चा निको भएको भन्दै वुवा रमेश तामाङले खुशी व्यक्त गरे । अप्रेशनपछि नवजात शिशु बिशेषज्ञ डा.सुनिल राजा मानन्धरको प्रत्यक्ष निगरानीमा बच्चालाई दुई हप्ता अस्पतालमा राखिएको थियो । उनको स्वास्थ्य अवस्था सामान्य बनेपछि शुक्रबार डिस्चार्ज गरिएको छ ।

सफल स्वास्थ्य व्यवसायी मानिने डा.सुनिल शर्माले केएमसी अध्यक्षको जिम्मेवारी सम्हालेपछि अहिले दक्ष डाक्टर र अत्याधुनिक उपकरणको व्यवस्था मिलाएर उपचार सेवालाई विस्तार गर्दै लगिएको छ । केही साता अघि मात्र केएमसीले नेपालकै सबैभन्दा ठूलो र अत्याधुनिक सुविधासहितको नवजात शिशु सघन उपचार कक्ष र वाल रोग सघन उपचार कक्ष सञ्चालनमा ल्याएको छ ।

- २३ आश्विन २०७८, शनिबार २१:२५ मा प्रकाशित


kmc
Kumari Advertisement
top ad