BREAKING NEWS
१५ मंसिर २०७८, बुधबार

नेपाली फिल्ममा तिहारः गीत संगित र कथाका प्रसंग

एक्सन खबर
नेपाली फिल्ममा तिहारः गीत संगित र कथाका प्रसंग

काठमाडौं । दीपावली हाम्रो घरआँगनमा आइसकेको छ । हर्षोल्लासका साथ मनाइने यसपर्वलाई झिलिमिली तथा बत्तीको पर्वको रुपमा पनि लिइन्छ । उज्यालो पर्व दीपावलीको प्रसँगलाई फिल्ममा उल्लासकै रुपमा प्रस्तुत गरिन्छ । यद्यपि केहिमा दिदीबहिनीको गुनासो वा तिहारकै बेला आइपर्ने संकटलाई पनि समेटिएको छ ।

दिदीभाई, भाईटिका, दिदी, प्यारी बहिनी, मामाघर, निखिल दाई, लक्ष्मीपूजा लगायतका फिल्महरुको शिर्षकबाटै दाजु बहिनी वा दिदीभाइ बीचको सम्बन्धसँगै महत्व बुझ्न सकिन्छ । दाजु बहिनी वा दिदी भाईबीचको सम्बन्धले नेपाली फिल्ममा ठूलै महत्व राख्दै आएको पाइन्छ ।

तुलसी घिमिरेको निर्देशनमा तयार भएको फिल्म अन्यायमा लक्ष्मीपूजाको प्रसँगलाई समेटिएको छ । फिल्मका कलाकारहरु विश्व बस्नेत र मीरा माधुरीद्धारा लक्ष्मीपूजा गरेर बत्ती बालेर गीत गाउने र नृत्य गर्ने दृश्य देखाइएको छ । ‘अधरमा आज उनकै छ’ बोलको गीत तिहारमा निकै रुचाइने गरिन्छ । यो फिल्मको गीतमा तिहारलाई राम्रोसँग चित्रण गरिएको छ ।

तिहारमा धेरै सुनिने गीत ‘तिहारै आयो लै झिलिमिली’मा अभिनेत्री गौरी मल्लको नृत्य देख्न सकिन्छ । शम्भू प्रधान निर्देशित फिल्म स्वर्गमा समावेश यो गीत पर्दामा देखिएको तिहारको एउटा स्मरणीय दृश्यको रुपमा लिन सकिन्छ । फिल्ममा गौरी मल्लले अर्जुन श्रेष्ठको दिदीको भुमिका निर्वाह गरेकी छिन् । तिहारमा याे गीत बजेपछि मात्र तिहार आए जस्ताे लाग्छ ।

कृष्टि मैनालीको दोहोरो भूमिका रहेको फिल्म लक्ष्मीपूजा पनि तिहारसँग जोडिएको महत्वपूर्ण फिल्म हो । यसमा लक्ष्मीपूजाकै दिन जन्मिएकी दुई दिदी बहिनीका रुपमा अभिनेत्री मैनालीले दोहोरो भुमिकालाई निर्वाह गरेकी छिन् ।

निर्देशक तुलसी घिमिरेकै सफल फिल्म चिनोमा तिहारको प्रसँगलाई मार्मिक रुपमा चित्रण गरिएको छ । यसै फिल्म मार्फत रातेकाइँलाको उपनाम पाएका सुनिल थापाले अभिनेता शिव श्रेष्ठको परिवारमा हमला गर्ने दृश्य राखिएको छ । उक्त दृश्यमा शिवका पिता बनेका केशव भट्टराईको हत्या हुन्छ । त्यहाँबाट ज्यान जोगाउन भाग्दा उक्त परिवारका सदस्यहरु छुट्टिन पुग्छन ।

फिल्म विजय पराजयको ‘निधारमा लर्काएर सप्तरंगी टिको’ गीत तिहारमा बज्ने गीतमध्ये एक हो । यस गीतको भिडियोमा भाईटिकाको विधि र महत्वबारे समेत वर्णन गरिएको छ । फिल्ममा बहिनी बनेकी रुपा राना र उनका दाईहरु भुवन केसी र कृष्ण मल्ल बनेका छन् । प्रहरी अधिकृत बनेका कृष्ण र अपराधी बनेका भुवन भाईटिकाको दिन बहिनीको हातबाट टिका थाप्न आउने प्रसङ्गलाई फिल्ममा प्रस्तुत गरिएको छ ।

यस्तै प्रसँग अमर रसाइली निर्देशित फिल्म धर्म समेटिएको छ । अपराधी सरोज खनाल र प्रहरी निरीक्षक दिदीको रुपमा कृष्टि मैनालीले अभिनय गरेको फिल्ममा दुवैले टिका लगाउने प्रसँगले भावुक पनि बनाउँछ ।

यस्तै, कृष्ण चापागाईँ निर्देशित फिल्म निखिल दाईमा रेखा थापा अभिनेता निखिल उप्रेतीको बहिनीको भुमिकामा प्रस्तुत भएकी छिन् । यसमा बहिनी रेखामाथि संकट आइपर्दा दाजु निखिलले उद्धार गरेको कथा भन्छ । यसमा रेखाले निखिललाई भाइटिका लगाईदिएको दृश्यले दर्शकलाई भावुक बनाउँछ ।

नेपाली फिल्म दिदीमा मिथिला शर्माले शीर्ष भूमिका निर्वाह गरेकी छिन् । अभिनेत्री शर्माले दिदी आफ्ना भाई बहिनीहरुको पालन पोषणमा जीन्दगी नै समर्पण गरेकी ममतामय दिदीको भुमिका निर्वाह गरेकी छिन् ।

- १९ कार्तिक २०७८, शुक्रबार १७:०५ मा प्रकाशित



top ad