मोरङ, १३ असोज । नेकपा (एमाले) कोशी प्रदेशको अधिवेशनमा प्रदेश इन्चार्ज रघुविर महासेठको अध्यक्षतामा १० सदस्यीय अध्यक्ष मण्डल बनेको छ । अधिवेशन सञ्चालनको लागि अध्यक्ष मण्डलको गठन भएको हो ।

अधिवेशनको अध्यक्ष मण्डलको सदस्यहरुमा राजेन्द्र गौतम, हिक्मत कार्की, अग्नि खरेल, शिवमाया तुम्वाहाम्फे, परशुराम मेघी गुरुङ, जगदिशप्रसाद कुसियत, भगबती चौधरी, राम राना र सुनिता बराल रहेका छन् ।

प्रदेश अधिवेशनको शुक्रबार एमाले अध्यक्ष केपी शर्मा ओलीले उद्घाटन गरेका थिए । कोशी प्रदेशको नेतृत्वका लागि विनोद ढकाल र घनश्याम खतिवडाविच प्रतिष्पर्धा हुने देखिएको छ । अध्यक्ष ओलीले सकेसम्म सर्वसम्मत नेतृत्व चयन गर्न निर्देशन दिएका छन् । मतदानमा जानै परे प्यानल बनाउन निषेध गरिएको छ ।