विराटनगर। सरकारले जनतामा निराशा पैदा हुन नदिने प्रदेश नं. १ सरकारका आन्तरिक मामिला तथा कानूनमन्त्री केदार कार्कीले  बताएका छन् । मंगलबार पत्रकार सम्मेलन गर्दै मन्त्री कार्कीले सरकार जनताको सेवक भएर काम गर्ने बताउँदै आफ्नो दायित्व पारदर्शी ढङ्गले पूरा गर्ने पनि बताए ।

केपी शर्मा ओलीको दुई तिहाईको सरकार तानाशाही बनेकाे उल्लेख गर्दै मन्त्री कार्कीले केपी शर्मा ओलीको मानसिकताका कारण फेरि पनि लोकतन्त्र अन्योलको भूमरीमा फस्न पुगेको पनि चर्चा गरे । ‘केपी शर्मा ओलीको मानसिकता तानाशाही छ, त्यसलाई सही ठाँउमा ल्याउन चुनौती हामीसामू अझै विद्यमान छ।’ कार्कीले भने ।

 नेपाली कांग्रेसकै नेतृत्वमा मुलुकको विकास सम्भव रहेको जिकिर गर्दै कांग्रेससहित गठबन्धन दल त्यही भूमिकामा रहेको कार्कीकाे दावी छ । ‘मुलुककाे विकास कसैले गर्छ भने त्याे कांग्रेसले मात्र गर्छ । याे गठबन्धन विकास, शुसासन र शान्तिका पक्षमा रहेर काम गर्छ ।’ उनले भने ।

प्रदेश १ सरकारले प्रदेशका १४ वटै जिल्ला अन्तरगत प्रहरी चौकीहरुको मर्मत सम्भार गरि पूर्वधारको विकास गर्ने बताउँदै मन्त्री कार्कीले अपराधिक घटना नियन्त्रण गर्ने, अपराधीलाई कानुनी कारबाहीको दायरामा ल्याउने र पीडितलाई न्याय दिलाई समाजमा पुनःस्थापित गराउने दायित्व मन्त्रालयले ग्रहण गरेको जनाए ।

काेराेना भाइरस नयाँ भेरियन्टमा देखापरेकाे प्रति प्रदेश सरकार चनाखाे रहेकाे जिकीर गर्दै कार्कीले ओमिक्रोन भाइरसबाट आम नागरिकलाई बचाउन सरकार प्रतिबद्ध रहेकाे विस्वास व्यक्त गरे ।  भारत तथा तेस्रो देशबाट आउने नागरिकको अनिवार्य स्वास्थ्य परीक्षण गर्ने कार्यलाई निरन्तरता दिने व्यवस्था मिलाएको, संक्रमित पहिचान भएकालाई कोभिड १९ उपचार केन्द्र, होल्डिङ सेन्टर लगायत ठाउँमा राखेर उपचार गरिरहेको जनाए ।

यस्तै मन्त्रालयले विपद व्यवस्थापनमा तीनवटै सुरक्षा निकाय, युवा, विद्यार्थीलगायत नागरिक समाजसँग हातेमालो गर्दै तालिम, जनचेतना मूलक कार्यक्रम गर्दै आएको पनि बताए । प्रदेशको १३७ वटै पालिकामा स्वयम्सेवक समूह गठन गर्ने र समूहले विपद् व्यवस्थापन एवं लागूऔषधविरुद्ध अभियान पनि सञ्चालन गर्ने उनकाे भनाइ छ ।

मन्त्री कार्कीले प्रदेशबाटै राजपत्र छाप्न मेशिन खरिद गर्ने प्रक्रिया अघि बढिसकेको बताउँदै सबैको हातहातमा राजपत्र पुर्याउने बताए । प्रदेश १ का सञ्चार गृहको तथ्यांकीकरण गर्ने, पत्रकारको क्षमता अभिवृद्धि गर्ने र सञ्चार गृहहरुको अनुगमन गरी समस्या पहिचान गरिने बताए ।