काठमाडाैं । उपत्यकाको गोकेर्णेश्वर नगरपालिकाले पालिकाभित्रका विद्यालयमा भौतिक पठनपाठन सञ्चालनको निर्णय गरेको छ ।

संघ सरकारले माघ मसान्तसम्म विद्यालय, कलेज, विश्वविद्यालय तथा शैक्षिक प्रतिष्ठानमा भौतिक उपस्थितिमा पठनपाठन रोक्ने निर्णय गरेको थियो । सोही अनुसार संघीय मामिला तथा सामान्य प्रशासन मन्त्रालयमार्फत स्थानीय तहलाई परिपत्र भएको थियो ।

तर, गोकर्णेश्वरले भने २३ माघ अर्थात् आगामी आइतबारबाट भौतिक उपस्थितिमै विद्यालयमा पठनपाठन गर्ने निर्णय गरेको हो । एउटा कक्षामा २५ जनाभन्दा बढी विद्यार्थी नराख्ने गरी आलोपालो गरेर कक्षा सञ्चालनको निर्णय भएको नगरपालिकाका मेयर सन्तोष चालिसेले जानकारी दिए ।

कोरोना महामारीको संक्रमण बढेपछि सरकारले पुस अन्तिम साताबाट विद्यालयमा भौतिक उपस्थितिमा पठनपाठन रोकेको थियो । १५ माघसम्मका लागि पठनपाठन बन्द भए पनि फेरि लम्ब्याएर माघ मसान्तसम्म कायम गरिएको छ ।