काठमाडौं, ३१ भदौ । सिनामंगल स्थित काठमाडौं मेडिकल कलेजले काठमाडौंको बहती पोखरीमा निःशुल्क स्वास्थ्य शिविर सञ्चालन गरेको छ । केएमसीले जि.पी. फाउण्डेशन, कुमारी क्लब तथा इल्फा स्कुलसँगको सहकार्यमा काठमाडौं महानगरपालिका वडा नं. १६ मा निःशुल्क स्वास्थ्य शिविर चलाएको हो ।

केएमसीका जनरल मेनेजर नारायण दाहालका अनुसार उक्त स्वास्थ्य शिविरमा केएमसीका वरिष्ठ चिकित्सक तथा नर्सहरुले ९७२ जना बिरामीको स्वास्थ्य परीक्षण गरे । स्वास्थ्य शिविरमा आएका मध्ये १५२ जनाको इसिजी गरिएको थियो । भने, २१३ जनाको ल्याब परीक्षण तथा १९२ जनाको भिडियो एक्सरे गरिएको छ ।

यस्तै, निःशुल्क स्वास्थ्य परीक्षणमा आएका २२ जनाको दाँत खोलिएको तथा ३७ जनाको स्वास्थ्य परीक्षण पश्चात थप उपचारका लागि ओ.टी. रेफर गरिएको केएमसीले जनाएको छ ।

केएमसीका कार्यकारी अध्यक्ष डा. सुनिल शर्माले निःशुल्क स्वास्थ्य परीक्षण अभियान सुरु गरेसँगै विपन्न, बालबालिका, महिला तथा जेष्ठनागरिकले आफ्नै गाउँघरमा दक्ष तथा वरिष्ठ चिकित्सकबाट स्वास्थ्य सेवा पाइरहेका छन् । डा. शर्माले निःशुल्क स्वास्थ्य शिविर जारी रहने बताएका छन् ।