बेलबारी, ३० कार्तिक । मोरङ क्षेत्र नम्बर ३ मा संयुक्त लोकतान्त्रिक बाम गठबन्धनको तर्फबाट नेपाली कांग्रेसका उम्मेद्वार डा. सुनिल शर्माले चुनाव जितेपछि सचिवालय बनाएर जनताका गुनासा सुनेर काम गर्ने बताएका छन् । शर्माले हरेक चुनावी कोणसभामा यस्तो बताउने गरेका छन् ।   

सो सचिवालय नेकपा माओवादी केन्द्रका बेलबारी नगर इन्चार्ज तिलक राईलाई सचिवालयको अध्यक्ष बनाउने शर्माले बताए । ‘चुनाव जितेपछि क्षेत्र नम्बर ३ मा रहेका जनताको समस्या सुन्न क्षेत्र नम्बर ३ का सबै सांसद सम्मिलित सचिवालय बनाइनेछ’, पायक पर्ने स्थानमा राखिने सो सचिवालयमा क्षेत्रवासीले गुनासा टिपाउन सक्ने भन्दै उनले भने, ‘मोरङ क्षेत्र नम्बर ३ मा अहिलेको गठबन्धनमा प्रत्यक्षतर्फ उम्मेद्वार नपाएको नेकपा माओवादी केन्द्रका अध्यक्ष तिलक राईलाई सचिवालयको अध्यक्ष बनाइनेछ ।’

यसरी सचिवालयमार्फत् काम गर्न थालेपछि जनताका समस्या सुन्न सहज हुने र समानुपातिक ढङ्गले विकास हुनेमा आफू विश्वस्त रहेको शर्माले बताए ।