दुहवी, १४ मंसिर । निर्वाचन अधिकृतको कार्यालय सुनसरी क्षेत्र नं. ३ ले प्रतिनिधि सभा तथा प्रदेश सभा सदस्य पदमा विजयी उम्मेदवारलाई प्रमाणपत्र प्रदान गरेको छ । आज दुहवीस्थित निर्वाचन अधिकृतको कार्यालयमा आयोजित समारोहमा प्रमुख निर्वाचन अधिकृत उमाकान्त पौडेलले प्रतिनिधि सभाकी विजयी उम्मेदवार भगबती चौधरी, प्रदेश सभा १ र २ का विजयी उम्मेदवार रोहीत बहादुर कार्की र रामदेव यादवलाई प्रमाणपत्र प्रदान गरेका हुन् ।

सो अवसरमा बोल्दै प्रतिनिधि सभा विजयी उम्मेदवार भगबती चौधरीले निर्वाचन शान्तिपूर्ण र सौहार्दपूर्ण रुपमा गराउन सफल निर्वाचन आयोगका कर्मचारी, सुरक्षा निकाय र मतदातालाई धन्यवाद दिँदै आफु सुनसरी क्षेत्र नं. ३ को विकास र समृद्धिमा लागि पर्ने बताइन् । सुनसरी क्षेत्र नं. ३ का जनताको समृद्धिकै लागि आफु राजनीतिमा लागेको बताउँदै जनताका समस्याहरु समाधान गर्न प्रतिबद्ध रहेको जनाइन् ।

कार्यक्रममा प्रदेश सभा २ तर्फका नेपाली कांग्रेसका प्रत्यासी उम्मेदवार विन्देश्वर यादव, माओवादी केन्द्रका नेता तथा स्थानीय जनताहरुको उपस्थिति रहेको थियो ।

गच्छदारले देखाएनन् राजनीतिक संस्कार

नेपाली राजनीतिमा मात्र हैन विश्व राजनीतिमै प्रायः विजयी उम्मेदवारलाई प्रत्यासी उम्मेदवारले भेट गरेर बधाई तथा शुभकामना दिने प्रचलन छ । तर, नेपाली कांग्रेसका उम्मेदवार पूर्वउपप्रधानमन्त्री बिजय गच्छदारले भगबती चौधरीलाई नत बधाई दिए, नत शुभकामना नै ।

मंगलबार निर्वाचन अधिकृतको कार्यालयले विजयी उम्मेदवारको नाम सार्वजनिक गर्दा र विजयी उम्मेदवारलाई माला पहिर्याउँदा गच्छदार अनुपस्थित रहे । आज अपरान्ह आयोजित प्रमाणपत्र वितरण कार्यक्रममा आउँछन् कि भन्ने थियो । तर, गच्छदार अनुपस्थित रहे ।

विजयी प्रत्यासी उम्मेदवारलाई गच्छदारले शुभकामना नदिएकोमा स्थानीय जनताले निको मानेनन् । ‘निर्वाचनको प्रतिष्पर्धा एक ठाउँमा होला तर, जित्नेलाई हार्नेले शुभकामना दिन सक्नुपर्दथ्यो । उहाँमा राजनीतिक संस्कार नै रहेनछ ।’ प्रमाणपत्र वितरण कार्यक्रममा सहभागी एक स्थानीयले भने ।

त्यसो त गच्छदारले चौधरीलाई फोनै बाट पनि बधाई दिन सक्थे, सामाजिक सञ्जालमा लेख्न सक्थे । तर, आजका दिनसम्म उनले त्यसो पनि गर्न सकेका छैनन् ।