धरान, १ पुष । भनेकाे नमान्ने कार्यपालिका सदस्यहरूलाई राजीनामा दिन धरान उपमहानगरपालिकाका मेयर हर्कराज साम्पाङले चेतावनी दिएका छन् । आफूले भनेको नमान्ने कार्यपालिका सदस्यहरूलाई राजीनामा दिएर मार्ग प्रशस्त गर्नुपर्ने सामाम्पाङकाे भनाइ छ ।

नगरकाे कार्यपालिका बैठक नियमित रूपमा बस्न नसकेपछि उनले पत्रकार सम्मेलन गर्दै भनेको नमान्ने कार्यपालिका सदस्यलाई राजीनामा दिन भने । एक महिनादेखि धरानमा कार्यपालिका बैठक बस्न नसकेपछि साम्पाङले अटेर गर्ने कार्यपालिका सदस्यहरूलाई राजीनामा दिन भनेका हुन् ।

बैठकमा बहु साँस्कृतिक पार्क बनाउने विषयमा कार्यपालिका सदस्य अनुप देवानले भनाइहरू राख्दा मेयर साम्पाङले बाहिर जान भनेपछि कार्यपालिका सदस्यलाई बोल्न नै नदिई बाहिर जानु भनेकाे भन्दै अन्य सदस्यहरूले विराेध गरे । त्यसपछि बैठक बसेको छैन ।

धरानका मेयर र उपमेयरबाहेक अरु कार्यपालिका सदस्यहरूले बैठकमा रायसमेत राख्नबाट वञ्चित गराएको भन्दै मेयरले माफी माग्नुपर्ने माग राखेका छन् । उनीहरूले हिजाे पत्रकार सम्मेलन नै गरेर मेयर तानाशाही भएकाे जिकिर गरेका थिए । मेयर साम्पाङले गैरसंवैधानिक र गैरकानुनी रुपमा तोकआदेशकै आधारमा काम गरिरहेको र त्यसको जवाफदेही नगर कार्यपालिका नहुने पनि उनले बताए ।

यता तीन जना कार्यपालिका सदस्यले मेयर साम्पाङले पछिल्लो समय ‘चमारे’ शब्द प्रयाेग गर्दै दिएकाे अभिव्यक्तिले दलित समुदायको मौलिक हक र अधिकार नै कुण्ठित पार्दै दुर्व्यवहार भएको भन्दै कानून अनुसारको कारबाही गर्न माग गरेका छन् ।

‘मंसिर २७ गते आफ्नो फेसबुक वालमा ‘जोरी खोज्नेहरूको बास उठ्न सक्छ । बल होइन बुद्धि लगा चमारे बुद्धि ।’ भन्ने अभिव्यक्तिले दलित समुदाय माथि नै चोट पर्न गएको र यसले दलित समुदायको मौलिक हक र अधिकारलाई कुण्ठित पार्दै दुर्व्यवहार भएको छ’ कार्यपालिका सदस्य त्रयले जारी गरेकाे प्रेस विज्ञप्तिमा उल्लेख छ ।

कार्यपालिका सदस्यत्रय सावित्री परियार, देवीमाया विक र दिनेश गजमेरले विज्ञप्ति निकालेर साम्पाङको अभिव्यक्तिको विरोध गरेका छन् ।