काठमाडौं, ४ पुष । नेकपा एमालेकी नेतृ भगबती चौधरीले सुनसरीको दुहवी नगरपालिका वडा नं. ९ स्थित छातावेलीमा आगलागीबाट ५ घर नष्ट भएको घटनाले आफु मर्माहत भएको जनाउँदै पिडित परिवारलाई तत्काल राहत उपलब्ध गराउन माग गरेकी छिन् ।

सुनसरी क्षेत्र नं. ३ बाट प्रतिनिधि सभा सदस्यमा निर्वाचित नेतृ चौधरीले आगलागीबाट ५ घर तथा लाखौंको धनमाल नष्ट भएको प्रति दुखः प्रकट गर्दै स्थानीय तह, प्रदेश सरकार र केन्द्र सरकारसँग तत्काल पिडित परिवारलाई राहत उपलब्ध गराउँदै पुर्नस्थापनाका लागि माग गरेकी हुन् ।

गएको पुष २ गते छातावेली (दुई तोलिया) मा आगलागी भई ५ वटा घर जलेर नष्ट भएको तथा लाखौंको धनमाल नष्ट भएको थियो । ‘यस घटनामा परी घर तथा लाखौंको धनमाल नष्ट भएकाले स्थानीय सरकार, प्रदेश सरकार र केन्द्र सरकारसँग पिडित परिवारलाई तत्काल राहत पुर्नस्थापना उपलब्ध गराउन जोडदार माग गर्दछु ।’ चौधरीले जारी गरेको विज्ञप्तिमा भनिएको छ ।

साथै, उनले उक्त विपत्तिबाट पिडित जनतालाई धैर्य धारण गर्न, हतोत्साहित नहुन आग्रह गर्दै व्यक्तिगत तवरबाट जस्तो सुकै सहयोग गर्न तत्पर रहेको जानकारी पनि गराएकी छिन् । कार्य व्यस्तताले काठमाडौंमा रहेकी चौधरीले केही दिनमै स्थलगत निरीक्षण, अनुगमन गर्न आउने समेत स्थानीय जनतालाई जानकारी गराएकी छिन् ।