काठमाडौं, २६ पुस । सिनामंगल स्थित काठमाडौं मेडिकल कलेजले आज भिमसेन स्थानमा निःशुल्क स्वास्थ्य शिविर सञ्चालन गरेको छ । केएमसीले कामना न्यूज पब्लिकेसन नेपाल पत्रकार महासंघ कामना प्रतिष्ठानसँगको सहकार्यमा काठमाडौं महानगरपालिका वडा नं. २० मा निःशुल्क स्वास्थ्य शिविर सञ्चालन गरेको हो ।

उक्त शिविरमा १२६३ जना सर्वसाधारणको स्वास्थ्य परीक्षण गरिएको केएमसीका जनरल मेनेजर नारायण दाहालले जानकारी दिए । दाहालका अनुसार स्वास्थ्य शिविरमा ८६ जनाको इसिजी, ११५ जनाको ल्याब परीक्षण र १२७ जनाकाे भिडियाे एक्सरे गरिएको छ । स्वास्थ्य शिविरमा केएमसीका विशेषज्ञ चिकित्सकहरुले बिरामी जाँचेका थिए ।

बर्तमान प्रतिनिधि सभा सदस्य डा. सुनिल शर्माले केएमसीको स्वास्थ्य सेवालाई समुदाय स्तरमा लैजान सुरुवात गरेका थिए । सांसदमा निर्वाचित हुनु अगाडी केएमसीको कार्यकारी अध्यक्ष रहेका डा. शर्माले जनतालाई सहज रुपमा स्वास्थ्य सेवा पुर्याउने लक्ष्यका साथ निःशुल्क स्वास्थ्य सेवा सुरु गरेका थिए । उनको यो अभियानले जनसमुदाय खासगरी गरिब, विपन्न वर्ग, महिला, बालबालिका तथा जेष्ठ्य नागरिकहरु बढी लाभाञ्वित भइरहेका छन् ।