पर्सा, १६ बैशाख । बिरगञ्जमा ईद मिलन समारोह भब्यताका साथ मनाइएको छ । मुस्लिम समाज पर्साद्वारा आयोजित ईद मिलन समारोहको प्रमुख अतिथि नेकपा एमालेका महासचिव इश्वर पोखरेल रहेका थिए ।

सो अबसरमा बोल्दै एमाले महासचिव पोखरेलले समाजमा शान्ति, स्थीरता, सुशासन र सदाचार कायम गर्न धार्मिक सहिष्णुता अपरिहार्य भएको बताउँदै नेपाल बहुजाति, भाषा, धर्मको साझा फुलवारीको रुपमा रहेको र अनन्तकालसम्म रहिरहने बताए । नेपालको सामाजिक सद्भाव भड्काउने कसैको प्रयास सफल नहुने बताउँदै समुन्नत समाज निर्माणमा सबै धर्म र समुदायको भूमिका महत्वपूर्ण हुने चर्चा गर्दै ईस्लाम धर्मको सारसँगै सबै धर्मको सार एकै रहेको पनि बताए ।

जुनसुकै भूगोलमा बसेपनि सबै जाति, धर्म, भाषा, संस्कृति, सम्प्रदाय र समुदाय विच ईद मिलन समारोहले एकताको सुत्रमा बाँध्न सफल भएको कार्यक्रमका सभापति बसरुद्धिन अन्सारीले बताए । सामाजिक, सांस्कृतिक, धार्मिक सहिष्णुता कायम गर्दै समाजलाई एकताको सुत्रमा बाँध्नका लागि कार्यक्रम आयोजना गरिएको बताउँदै मुस्लिम अगुवा नेता समेत रहेका अन्सारीले नेपालमा रहने सबै वर्ग,समुदाय र क्षेत्रको विचार नेपाल र नेपालीको सर्वोत्तम हितका लागि हुनु पर्ने बताए ।

कार्यक्रममा विरगञ्जका समाजसेवी, राजनीतिक दलका नेता, प्रदेश तथा प्रतिनिधि सभाका सांसदहरु, भारतीय महावाणिज्य दुतावासका प्रतिनिधि, स्थानीय निकाय, जिल्लाका प्रहरी प्रशासनका प्रमुख लगायत समाजका लब्ध प्रतिष्ठित व्यक्तिहरुको सहभागीता रहेको थियो ।

कार्यक्रममा बोल्ने वक्ताहरुले धर्म, संस्कृति र परम्पराहरु समाज र राष्ट्रको गहना भएकाले तीनको संरक्षण गर्दै सामाजिक भाइचारा, मित्रता कायम गर्दै शिष्ट र समुन्नत समाज निर्माणमा एक हुन आब्हान गरेका थिए ।