काठमाडौं, २२ वैशाख । आज बैशाख पुर्णिमा अर्थात् भगवान गाैतम बुद्धकाे जन्म जयन्ती । शान्तिका अग्रदूतका रूपमा विश्वमा परिचित सिद्धार्थ गौतमको २५६७औं जयन्ती आज भगवान् विष्णुको नवौं अवतारका रूपमा जन्म लिएकाे भन्दै धुमधामका साथ मनाइँदैछ । उनकाे जम्न लुम्विनीमा भएकाे हाे ।

गाैतम बुद्धले जन्म, ज्ञान प्राप्ति, महापरिनिर्वाण (मुत्यु) वैशाख शुक्ल पूर्णिमाकै दिन प्राप्त गरेकाेले आजकाे दिन बाैद्ध धम्मावलम्बीहरूले विशेष रूपमा मनाउने गर्दछन् । सिद्धार्थ गौतमले भारतको बोधगया पुगेर तपस्या गर्दै गर्दा बुद्धत्त्व प्राप्त गरेका थिए ।

सिद्धार्थ गौतमले विश्व शान्ति स्थापनाका लागि पुर्‍याएको योगदानको स्मरणस्वरूप यो पर्व मनाउने गरिएको हो । आज नेपाललगायत विश्वका बौद्ध धर्मावलम्बीले बुद्धप्रति भावपूर्ण श्रद्धा र भक्तिले बुद्ध जयन्ती मनाउने गर्दछन् ।

बौद्ध धर्मावलम्बीले चैत्य, गुम्बा, विहारलगायत स्थलमा लामा एवं बौद्ध धर्मगुरु बसेर परम्परादेखि हुँदै आएको पूजालगायत विधि पूरा गरिन्छ । साथै, बेलुकी घरमा दीपावली गरेर बुद्ध जयन्ती मनाउन सरकारले आह्वान गरेको छ । यस अवसरमा लुम्बिनी, स्वयम्भू, बौद्ध स्तुपा लगायतमा विविध कार्यक्रम आयोजना गरी बुद्ध जयन्ती मनाइने गरिएकाे छ ।

आजभन्दा २५६७ वर्षअघि इसापूर्व इसापूर्व ५६३ मा रुपन्देही जिल्लास्थित लुम्बिनी उद्यानमा पिता राजा शुद्धोधन र माता मायादेवीको गर्भबाट वैशाख शुक्ल पूर्णिमाका दिन सिद्धार्थ गौतमको जन्म भएको थियो ।

राजकुमारका रूपमा जन्म लिएका सिद्धार्थ गौतमले राजपाठ त्यागेर उनान्तीस वर्षको उमेरमा दरबार छोडी तपस्याका लागि निस्किएका थिए । बुद्ध भन्नाले बोधिप्राप्त वा अन्तिम सत्यको साक्षात्कार गरेको महामानव बुझिन्छ ।