काठमाडाैं, ८ जेठ । काभा वुमन्स् भलिबल च्यालेन्ज कपमा नेपालले विजयी सुरुवात गरेको छ । पाहुना टोली किर्गिस्तानलाई सोझो सेटमा हराउँदै  नेपालले विजयी सुरूवात गरेकाे हाे ।

नेपालले किर्गिस्तानलाई २५-११, २५-१९ र २५-११ को सोझो सेटमा पराजित गरेको छ । पहिलो र दोस्रो सेटमा अग्रता कायम गर्दै जितेको नेपालले तेस्रो सेटमा नेपाल किर्गिस्तानसँग ६-४ ले पछि परेपनि पुनरागमन गर्दै तेस्रो सेट पनि जित्यो ।

आजको खेलमा ओपन स्पाइकरद्वय निरुता ठगुन्ना र उषा भण्डारीको जोडीले उत्कृष्ठ खेले । आजको खेलमा संगम महतो र रिमा कुँवरले राष्ट्रिय टिममा डेब्यु गरे । आजको जितसँगै नेपालले महत्वपूर्ण ३ अंक बटुलेको छ । नेपालले दोस्रो खेल भोलि मंगलबार बंगलादेशसँग खेल्नेछ ।

त्रिपुरेश्वरस्थित राष्ट्रिय खेलकुद परिषद्को कभर्ड हलमा भएको उद्घाटन खेलमा उज्वेकिस्तानले श्रीलंकालाई ३-० को सोझो सेटमा हराएकाे छ ।

सेन्ट्रल एसियन भलिबल एसोसिएसन (काभा) मा आबद्ध १४ मध्ये विश्व भलिबलमै आफ्नो उपस्थिति गराइसकेको काजखस्तान तथा दक्षिण एसियाको बलियो टोली भारतसहित ८ टिम प्रतियोगितामा सहभागी छन् ।

नेपाल लगातार तेस्रो पटक उपाधि जितेर ह्याट्रिक गर्ने लक्ष्यमा छ । यो समूहमा नेपाल र किर्गिस्तानसहित भारत र बंगलादेश छन् ।