काठमाडौं । तीन दशकअघि आमाले अधुरै छाड्नुपरेको सपना यसपटक छोरीले साकार पारेकी छन् । हङकङमा जन्मिएकी तथा दोस्रो पुस्ताकी गैरआवासीय नेपाली (एनआरएन) दीपमाला ढकालले मिस नेपाल वर्ल्ड–२०२६ को उपाधि जित्दै आफ्नो परिवार मात्र होइन, विश्वभर फैलिएको नेपाली समुदायलाई गर्व गर्ने अवसर दिएकी छन् ।

ललितपुरस्थित द प्लाजा, पुल्चोकमा सम्पन्न मिस नेपाल–२०२६ को ग्राण्ड फिनालेमा अन्तिम प्रतिस्पर्धीहरूलाई पछि पार्दै दीपमाला विजेता घोषित भइन् । यसै प्रतियोगितामा आर्या निशान्त मिस नेपाल इन्टरनेशनल–२०२६ र कशिश सुब्बा मिस नेपाल कोस्मो–२०२६ घोषित भए ।

दीपमालाको यो सफलता केवल सौन्दर्य प्रतियोगिताको उपाधिमा सीमित छैन । उनी गैरआवासीय नेपाली संघ (एनआरएनए) को दोस्रो पुस्ताकी संयोजकसमेत हुन् । गत चैतमा सम्पन्न एनआरएनएको एकता महाधिवेशनबाट पहिलोपटक विधानमै व्यवस्था गरिएको ‘सेकेन्ड जेनेरेसन कोअर्डिनेटर’ पदमा उनी निर्वाचित भएकी थिइन् । 

उनको विजयले विश्वभर रहेका लाखौँ दोस्रो पुस्ताका नेपाली युवालाई आफ्नो भाषा, संस्कृति र पहिचानसँग जोडिन प्रेरित गर्ने विश्वास एनआरएनएका पदाधिकारीहरूले व्यक्त गरेका छन् । हङकङमै मिस नेपाल हङकङको उपाधि जितेकी उनी तेक्वान्दोकी ब्ल्याक बेल्ट खेलाडी तथा कुशल म्याराथन धावकसमेत हुन् ।

दीपमालाको यात्रालाई अझ भावुक बनाउने पक्ष भने उनको पारिवारिक इतिहास हो । सन् १९९४ मा नेपालमा पहिलोपटक आयोजना भएको मिस नेपाल प्रतियोगितामा उनकी आमा रोशनी खरेल पनि प्रतिस्पर्धी थिइन् । त्यतिबेला सामाजिक सोच र पारिवारिक अवरोधका कारण उनले आफ्नो सपना पूरा गर्न सकिनन् । शनिबार छोरीको नाम विजेताका रूपमा घोषणा हुँदा रोशनीका आँखामा खुशीका आँसु थिए ।

२३ वर्षीया दीपमालाले अर्थशास्त्रमा स्नातक गरेकी छन् । उनी विश्वकै अग्रणी अमेरिकी लगानी व्यवस्थापन कम्पनी ब्ल्याकरक मा इन्भेस्टमेन्ट एनालिस्टका रूपमा कार्यरत थिइन् । आकर्षक अन्तर्राष्ट्रिय करिअर र सुरक्षित भविष्य हुँदाहुँदै उनले नयाँ पहिचान निर्माण गर्न नेपाल रोजिन् । उनका बुबा सुरेन्द्रकुमार ढकाल हङकङमा इन्जिनियर हुन् ।

दीपमालाको जितले एउटा सन्देश स्पष्ट गरेको छ—दूरीले मातृभूमिसँगको सम्बन्ध कमजोर बनाउँदैन । बरु संस्कार, पहिचान र सपनाले संसारको जुनसुकै कुनामा रहेका नेपालीलाई एउटै भावनामा बाँधिरहन्छ । आमाको अधुरो सपना पूरा गर्दै दीपमालाले मिस नेपालको ताज मात्र जितेकी छैनन्, उनले विश्वभरका नेपाली युवाका लागि सम्भावनाको नयाँ अध्याय पनि खोलेकी छन् ।