काठमाडौं, ३१ भदौ । महिलाहरूकाे महान चाड हरितालिका तीजको अघिल्लो दिन आज दर खाने दिन हाे । दर खाएको भोलिपल्ट निराहार व्रत बस्ने प्रचलन भएकाले अघिल्लो साँझ पौष्टिक तत्व युक्त खानेकुरा (दर) खाने चलन छ ।

विशेषगरी विवाह गरी गएका दिदी बहिनीलाई माइती पक्षले तीजमा निम्ता गरी परिवारका सदस्य, इष्टमित्र र छिमेकीहरु एकै ठाउँमा भेला भएर विभिन्न मिठा परिकारको दर खाँदै रमाइलो गर्ने चलन छ ।

परापूर्व कालमा देवी पार्वतीले भगवान शिवलाई स्वामी पाउँ भनि निराहार व्रत बसेको र उनको मनाेकामना पुरा भएको विश्वासका साथ विवाहित महिलाहरु पतिको सुवास्थ्य र दीर्घायूको कामना गर्दै व्रत बस्ने चलन छ । साथै, अविवाहिताहरुले सुयोग्य बर पाउने तथा परिवारमा सुखः शान्तिकाे कामना गर्दै तीजको व्रत बसी भगवान शिवको पूजा गर्ने चलन छ ।

तीजको दिन काठमाडौंको पशुपति लगायतका देशभरका शिवालयहरुमा व्रतालुको घुइँचो लाग्दछ । उक्त दिन व्रतालु महिलाहरूले दिनभर निराहार बसी तीजका गितहरूमा नाचगान गर्ने, रमाइलाे गर्ने प्रचलन रहेकाे छ ।