काठमाडाैं । प्रतिनिधि सभाका सांसद डाक्टर सुनिलकुमार शर्माले तीनकुने घटनाको सम्पूर्ण जिम्मेवारी सरकारले लिनुपर्ने बताउनु भएकाे छन् । बिहीबार सिंहदरबारमा बसेको कानुन, न्याय तथा मानव अधिकार समितिको बैठकमा बोल्दै उहाँले कार्यक्रम हुनुपूर्व नै सरकारको तर्फबाट अश्रुग्याँस र हवाई फायर भएपछि आन्दोलनकारीहरू बिथोलिएको जिकिर गर्नु भयाे ।

नेपाली कांग्रेसका प्रभावशाली सांसद डा. शर्माले मञ्चमा कार्यक्रम गर्न नदिई आन्दोलन बिथोल्ने काम सरकारबाट भएको बताउँदै लोकतन्त्रमा सबै किसिमका विचार बोक्नेहरूले स्वतन्त्रतापूर्वक आफ्ना धारणा राख्न पाउनुपर्ने जनाउनु भयाे । उहाँले पार्टीहरू मिलेर जनतामाथि दमन गरेकोले तीनकुने घटनाको सत्यतथ्य छानबिन हुनुपर्ने माग गर्नुभयाे ।

कार्यक्रम सुरू नहुँदै स्टेजमै टियर ग्याँस प्रहार गरेर सरकारले फायर खोलेको भन्दै उहाँले सरकारले नै घटनाको जिम्मेवारी लिनुपर्ने बताउनु भयो । ‘स्टेजमा बसेर कार्यक्रम गर्नै नदिईकन, मान्छेलाई बोल्नै नदिईकन, सरकारले अश्रु ग्याँस हानेको छ । ७ सय ४६ वटा अश्रुग्याँस पड्काउने, १९२ वटा छर्रा पड्काउने, ब्ल्याङ्क फायर गर्ने, हवाई फायर ५८, २ राउण्ड पेस्तोलको गोली वा आँखाले ट्याक्कै मल्टिपल भिडियोहरू तपाईँले कलेक्सन गरेर हेर्नुस् ।’ सांसद शर्माले भन्नुभयाे । 

उहाँले  लोकतन्त्रवादी भनिरहँदा लोकतन्त्र भनेकाे गार्डेन, नर्सरी, जहाँ फरक-फरक खालका विचारहरू स्वतन्त्रतापूर्वक फुल्न पाउनुपर्ने जिकीर गर्नु भयाे । ‘चाहे त्यो राजावादी होस्, चाहे माओवादी, काँग्रेस वा अर्को पार्टी । कुनै पनि विचार हातमा हतियार नलिइकिन राखिने विचारलाई स्वागत गर्नुपर्छ ।’ डा. शर्माले भन्नुभयाे । 

सांसद शर्माले राष्ट्रिय प्रजातन्त्र पार्टीका वरिष्ठ उपाध्यक्ष रवीन्द्र मिश्र र महामन्त्री एवं सांसद धवल शमशेर जबरालाई सरकारले शक्तिको दुरुपयोग गरेर हतकडी लगाएर थुनेको पनि बताउनु भयाे । भने, सरकारले यसबारेमा राप्रपा वा पूर्वराजा ज्ञानेन्द्र शाहसँग छलफल गर्नुपर्ने उल्लेख गर्नुभयाे ।