माेरङ । नेकपा एमालेको लामो समयसम्मको सक्रिय राजनीतिलाई बिदा दिँदै सुन्दरहरैंचाकी अग्रज महिला नेता तुलसा मेयान्ङ्वाे नेपाली कांग्रेसमा प्रवेश गरेकी छन् । एमाले निकट अखिल नेपाल महिला संघ सुन्दरहरैंचाकी सचिवसमेत रहेकी मेयान्ङ्वाेले शनिबार एक कार्यक्रमबीच नेपाली कांग्रेसमा प्रवेश गरेकी हुन् ।

कांग्रेसका केन्द्रीय महासमिति सदस्य तथा प्रतिनिधिसभा सदस्य डा. सुनिल कुमार शर्माले मेयान्ङ्वाेलाई पार्टीमा स्वागत गरे । कार्यक्रममा डा. शर्माले तुलसा मेयान्ङ्वाेको आगमनले कांग्रेस संगठनलाई स्थानीयस्तरमा थप मजबुत बनाउने विश्वास व्यक्त गरे । ‘तुलसा दिदीले लामो समय पार्टीमा दिएको योगदान प्रशंसनीय छ । अहिले उहाँले लोकतान्त्रिक धारको पक्षमा उभिने निर्णय लिनुहुँदा हामीलाई ऊर्जा मिलेको छ,’ सांसद शर्माले भने ।

मेयान्ङ्वाे नेकपा एमालेको सक्रिय सदस्यका रूपमा राजनीतिक जीवनमा होमिएकी थिइन् । पार्टीको विभिन्न तह र जिम्मेवारी सम्हाल्दै आएको उनको लामो राजनीतिक यात्राले स्थानीय तहमा उनीप्रति प्रभावशाली छवि बनाएको थियो । पार्टी प्रवेश कार्यक्रममा बोल्दै तुलसा मेयान्ङ्वाेले आफू लोकतान्त्रिक मूल्य र मान्यताप्रति प्रतिबद्ध रहेको र त्यसैले नेपाली कांग्रेस रोजेको बताइन् । ‘अब बाँकी जीवन लोकतन्त्र, समावेशीता र सामाजिक न्यायका लागि कांग्रेसमार्फत समर्पित हुनेछ,’ उनले भनिन् ।

कार्यक्रममा कांग्रेसका स्थानीय नेताहरू, महिला नेतृहरू तथा कार्यकर्ताहरूको उल्लेख्य उपस्थिति रहेको थियो ।