धरान। सुनसरीको धरानस्थित न्यु कान्तिपुर होटल एण्ड गेष्ट हाउसमा महिलाको हत्या गरी फरार रहेका पुरुषलाई प्रहरीले सार्वजनिक गरेकाे छ । इलाका प्रहरी कार्यलय धरानले जिल्ला प्रहरी कार्यलय सुनसरीका प्रमुख एसपी सञ्जय सिंह थापाको रोहवरमा सार्वजनिक गरेको हाे ।

प्रहरीले हत्यारा आरोपीलाई पाँच दिनपछि पक्राउ गरी सार्वजनिक गरेकाे हाे । प्रहरीकाअनुसार पक्राउ परेका पुरुष धनकुटाको पाख्रिबास नगरपालिका-६ फलाँटे घर भएका २४ बर्षिय दिनेश राना मगर रहेका छन् ।

एसपी थापाका अनुसार होटलमा महिलाको हत्या गरी फरार रहेका राना मगरलाई खोजी गर्नेक्रममा शनिवार धनकुटाको छथर जोरपाटी गाउँपालिकामा रहेको उनको ससुरालीबाट पक्राउ परेका हुन् । जिल्ला प्रहरी कार्यालय धनकुटाको सहयोगमा फरार रहेका राना मगरलाई पक्राउ गरिएकाे हाे । पक्राउ परेका दिनेश पनि विवाहित रहेको बताइएको छ ।

प्रहरीका अनुसार केही समय पहिले इटहरीमा सिटी सफारी चलाउने गरेको र सोही समयमा इटहरी-५ तुलसा टोल बस्दै आएकी मृतक सुमित्रा तामाङसँग भेट भएको थियो । सो क्रममा उनीहरू बिच प्रेम सम्बन्ध कायम हुन पुगेको थियो । दिनेश पछिल्लो समय ह्याभी इकुपमेन्टको सह चालक बनेर तीन चार महिनादेखि भोजपुर बस्न थालेका थिए । यो बिचमा उनीहरूको सम्बन्धमा खटपट भएपछि होटलमा हत्या गर्न पुगेको प्रहरीको प्रारम्भिक बयानमा बताएको जानकारी दिइयाे । उनले हत्या गरेकाे स्वीकार गरेका छन् ।

गत मंगलबार धरान-१८ बुद्धचौक स्थित न्यु कान्तिपुर होटल एण्ड गेष्ठ हाउसमा पाँचथरको मिक्लाजुङ-१ की ३९ वर्षीय सुमित्रा तामाङ मृत फेला परेकी थिइन् । मृतकको शवको पहिचान उनकै छोराछोरीले गरेका थिए ।  

उनका श्रीमान् पूर्व भारतीय सेना रहेको र हाल ब्रुनाईमा कार्यरत रहेको बताइएको छ । उनी इटहरी उपमहानगरपालिका ५ तुलसा टोलमा विगत चार पाँच वर्षदेखि बसोबास गर्दै आएका थिए ।