सुनसरी । सुनसरीकाे इटहरीमा गएराती बम विस्फाेट हुँदा दुई जना घाइते भएका छन् । इटहरी-२ को नवजागृति टोलमा रहेकाे एक घरमा बम विस्फोट भएकाे हाे ।

इटहरी-२ नवजागृति टोलमा रहेको अमित श्रेष्ठको घरमा गएरातती साढे १० बजे विस्फोट भएको जिल्ला प्रहरी कार्यालय सुनसरीका प्रमुख एसपी सञ्जयसिंह थापाले जानकारी दिए । उनका अनुसार श्रेष्ठको घरमा डेरा गरी बस्ने २२ वर्षीय रबिन थापा र लमजुङ-५ ढोडेनीका २३ बर्षिया शेरजंग गुरुङ घाइते भएका छन् । उनीहरूको कोठा भित्रै गएराती विस्फोट भएको हो ।

जिल्ला प्रहरी सुनसरीका अनुसार घाइते भएका रविन थापाको आँखामा चोट लागेकोले बिराटनगरस्थित आँखा अस्पतालमा उपचार भइरहेको छ । अर्का घाइते शेरजंग गुरुङको विपी कोइराला स्वास्थ्य विज्ञान प्रतिष्ठान धरानमा उपचार भइरहेको छ । उनको हातमा र तिघ्रामा चोट लागेको प्रहरीले जनाएकाे छ ।

उक्त घरमा सुतली बम विस्फोट भएको हुनसक्ने प्रहरीको प्रारम्भिक अनुसन्धानबाट खुलेकाे छ । घटनास्थलबाट प्रहरीले  हिमाल सुरक्षा परिषद् नेपालको पर्चा बरामद गरेको छ ।

गुरुङ उक्त घरमा १५ दिन अघि मात्र आएकाे र उनले ल्याएको झोलामा विस्फोटक पदार्थ रहेको हुनसक्ने इलाका प्रहरी कार्यालय इटहरीको अनुमान छ । भने, डेरामा बरामद भएको हिमाल सुरक्षा परिषद्को पर्चा भर्खरै सशस्त्र युद्धको घोषणा गरेको सङ्गठनको भएको जनाएको छ ।

फागुन १५ गते उक्त सङ्गठनले विज्ञप्ति निकाल्दै सशस्त्र युद्धको घोषणा गरेको थियो । सङ्घीयता खारेज, ५ विकास क्षेत्र कायम गरिनुपर्ने, हिन्दु राष्ट्र कायम गर्नुपर्ने, नागरिकता छानबिन गर्नुपर्ने, भारत–चीन सीमा विवाद समाधान गरिनुपर्ने, एमसीसी सम्झौता खारेज गरिनुपर्ने लगायतका मागहरू राख्दै याे सङ्गठन सशष्त्र युद्धमा लागेकाे छ ।