सुनसरी । जनताको बहुदलीय जनवाद नै समृद्ध देश निमार्णको आधार रहेको नेकपा एमालेकी केन्द्रीय सदस्य नेतृ भगवती चौधरीले बताएकी छन् । दुहवी नगरपालिका अन्तरगत रहेका विभिन्न भातृसंगठनहरुको अधिवेशनमा बोल्दै चौधरीले मुलुकको विकासका लागि जनताको बहुदलीय जनवाद नै प्रमुख मार्गदर्शन रहेको बताउँदै एमाले वाहेक कुनै दलसँग समाजवादको एजेण्डा नरहेको पनि जिकीर गरिन् ।

रिटर्नी फेडरेशन, किसान महासंघ, नेपाल खेलकुद महासंघ तथा नेपाल उत्पिडित जातीय मुक्ति समाजको नगर अधिवेशनमा बोल्दै नेतृ चौधरीले भनिन्–‘जनताको बहुलदीय जनवादमै मुलुकको भाग्य र भविष्य जोडिएको छ । यो बैज्ञानिक, आधुनिक छ । जनताको आकांक्षा र चाहनालाई मुर्तरुप दिने अभियान हो ।’

पूर्वराज्यमन्त्री समेत रहेकी नेतृ चौधरीले आधुनिक तथा बैज्ञानिक कृषि प्रणाली अवलम्बन गर्दै कृषि क्षेत्रलाई व्यवसायीकरण गर्नुपर्ने र त्यसका लागि उत्पादन हुने क्षेत्रमा सामुहिक चक्लावन्दी कृषि प्रणाली लागू गर्नुपर्ने पनि बताइन् ।

आउँदो बैशाख ३० गते हुन गइरहेको स्थानीय तहको निर्वाचनमा पार्टीले सबै तहमा ऐतिहासिक जीत हासिल गर्नुपर्ने बताउँदै चौधरीले सम्पूर्ण नेता कार्यकर्ताहरुलाई स्थानीय निर्वाचनमा ध्यान दिन निर्देशन दिइन् । ‘म सबै कमरेडहरुलाई भन्न चाहन्छु, समय धेरै छैन, सवा महिना जति छ, हामीले चुनाव जित्ने हतियार भनेको संगठन, संगठनमा परिचालित हुने कमरेडहरु नै हो । कमरेडहरुले आफ्नो मान्छे को प्रतिपक्षी को छुट्याएर काम गर्नुहोस् ।’ चौधरीले ३६४ दिन पार्टीमा खट्ने बाँकी एक दिन विक्रि हुने प्रथाको अन्त्य गरिनुपर्ने पनि बताइन् ।

कम्युनिस्टहरुको मुलधार नै समाजवाद रहेको तर्क गर्दै सिप, ज्ञान हासिल गरेर विदेशबाट फर्किएकाहरुले पनि आफ्नो घर परिवार, समाज निर्माणमा लाग्नुपर्ने बताइन् । रिटर्नी फेडरेशनले विदेशमा काम गरेर ज्ञान, सिप हासिल गरेकाहरुलाई संगठित गर्दै उनीहरुलाई स्वदेशमै काम गर्न प्रोत्साहित गरेको पनि बताइन् ।

कार्यक्रममा संघीय समाजवादी एक नम्बर प्रदेश सचिवालय सदस्य पिंकी खातुन पार्टी परित्याग गरी नेकपा एमालेमा प्रवेश गरिन् । उनलाई नेतृ चौधरीले अविर तथा खादा लगाएर पार्टीमा प्रवेश गराएकी थिइन् ।

एमालेमा प्रवेश गर्नेहरुको लहर

यसअघि दुहवी नगरपालिका वडा नं. ११ तनमुनामा नेकपा एमालेले गरेको पार्टी कार्यालय उद्घाटन कार्यक्रममा विभिन्न पार्टी परित्याग गरी दर्जनौं नेता कार्यकर्ताहरु नेकपा एमालेमा प्रवेश गरेका छन् । नेतृ चौधरीले उनीहरुलाई अविर तथा खादा लगाएर पार्टी प्रवेश गराएकी थिइन् ।

पछिल्लो समय सुनसरी ३ मा नेकपा एमालेमा प्रवेश गर्नेहरुले लहर चलेको छ । एमालेले मात्र जनताको आधारभूत आवश्यक्ता पुरा गर्छ, मुलुकमा समाजवाद ल्याउँछ भनेर विभिन्न पार्टी परित्याग गर्दै एमालेमा समाहित हुनेहरुको संख्या बढीरहेको नेतृ चौधरीले बताइन् । दुई तिहाई नजिकको बलियो सरकार ढालेर मुलुकमा अस्थिरता पैदा गरेकोले जनतामा गठबन्धन दलहरु प्रति वितृष्णा जागेको चौधरीको भनाई छ । आउँदो स्थानीय र त्यसपछि हुने प्रतिनिधिसभा निर्वाचनमा नेकपा एमालेले ऐतिहासिल जित हासिल गर्ने उनको दावी छ ।