धरान । धरान उपमाहानगरपालिकामा एमालेको लालकिल्ला भत्काउने नेपाली कांग्रेसलाई समेत चुनौति दिनेगरी नेकपा माओवादी केन्द्रबाट खगेन्द्र श्रेष्ठले नगर प्रमुखमा दावी गर्दै आधारहरु प्रस्तुत गरेका छन् ।

यसपटक माओवादी पार्टीले आफुलाई नै टीकट दिने भन्दै चुनावी अभियानमा समेत होमिएका श्रेष्ठले आफना दावीहरु प्रस्तुत गरेका हुन् । २०७४ सालको निर्वाचनमा एमालेका तारा सुब्बा विजयी हुँदा मतसंख्याको आधारमा नेपाली कांग्रेसका तिलक राई दोस्रो र माओवादी केन्द्रका आइन्द्रबिक्रम बेघा तेस्रो भएका थिए ।

तर, मेयर सुब्बाको निधन पछिकाे उपनिर्वाचनमा माओवादीसँग मिलेर उठेका तिलक राईले एमालेका प्रकाश राईलाई पराजित गरेका थिए । तर, यसपालि भने त्यसो नहुने मेयरका आकांक्षी श्रेष्ठको भनाई छ । यसपटक मेयरमा माओवादीले दावी गर्ने उनले भनेका छन् ।

उनले आफु मेयरमा जिते जनप्रतिनिधिहरूले प्राप्त गर्ने सेवा सुविधामा पनि पुर्नविचार गर्ने समेत बताएका छन् । साथै, धार्मिक, सांस्कृतिक तथा पर्यटकीय शहरका रुपमा रहेको धरानलाई स्मार्ट सिटि सहरको रुपमा विकास गर्ने  आफ्नाे याेजना रहेकाे बताएका छन् ।

त्यस्तै श्रेष्ठले अघिल्लो निर्वाचनमा धरानका २० वडा वडामा एमालेले १४, कांग्रेसले ५ र माओवादी केन्द्रले एउटा वडा जितेको बताउँदै एमालेसँगको एकता र विभाजनपछि माओवादी केन्द्रको संगठन ब्यापक विस्तार भएको बताउँदै यसपटककाे निर्वाचनमा माओवादी केन्द्र बलियाे शक्तिका रूपमा उदाउने पनि जिकीर गरे ।

पछिल्लाे समय १० वर्षे शसस्त्र जनयुद्ध, जनान्दाेलन ०६२/०६३, मधेश आन्दाेलनबाट प्राप्त लाेकतन्त्र, गणतन्त्र, धर्मनिरपेक्षता, संघीयता नै गुम्ने सड्यन्त्र भइरहेकाे भन्दै ती उपलब्धीहरूकाे रक्षार्थ माओवादी केन्द्रकाे जीत अपरिहार्य रहेकाे पनि जिकीर गरे ।

धरानकाे विकास, धरानकाे साझा समस्या दिर्घकालिन रूपमा समाधान गर्न तथा उपमहानगरपालिकाको खर्च कम गर्ने र आम्दानी बढाउने याेजना तयार गरेकाे पनि बताए । ‘म मेयरमा जितेपछि धरान उपमहानगरपालिकाकाे अनावश्यक खर्च कटाैती गर्न पहिले लाग्छु । विलासिता महंगा गाडी प्रयाेग गर्दिन, सिटी सफारी नै चढछु ।’ श्रेष्ठले भने ।
 
यस पटक धराने जनताले संघीयता, गणतन्त्र र धर्मनिरपेक्षता ल्याउने पार्टीको रुपमा स्थापित माओवादीलाई भोट दिनुपर्ने मेयर पदका आकांक्षी उम्मेदवार रेष्ठको भनाइ छ ।