काठमाडौं, २३ जेठ । अन्तर्राष्ट्रिय मैत्रीपूर्ण खेलमा लियाेनल मेस्सी एक्लैले ५ गाेल गरेका छन् । अर्जेन्टिना र एस्टोनिया विचकाे मैत्रीपूर्ण खेलमा अर्जेन्टाइन कप्तान मेस्सीले ५ गाेल गरेका हुन् ।

आइतबार राति भएको खेलमा कोपा अमेरिका विजेता अर्जेन्टिनाले एस्टाेेनियालाई ५–० काे गाेल अन्तरमा पराजित गरेकाे हाे । खेलकाे पहिलो हाफमा दुई गोल गरेका मेस्सीले दोस्रो हाफमा तीन गोल गरेका थिए । आठौं मिनेटमा पेनाल्टीबाट खाता खोलेका मेस्सीले खेलको ४५, ४७, ७१ र ७६ मिनेटमा गोल गरेका थिए ।

योसँगै अर्जेन्टिना ३३औं खेलसम्म अपराजित रहन सफल भएको छ । फाइनालिसिमामा इटालीलाई हराएर उपाधि जितेको प्रशिक्षक लियोनेल स्कोलानीले आफ्नो प्रशिक्षणमा ३३ खेलसम्म अपराजित रहेको कीर्तिमान बनाएका छन् । मेस्सीले इस्टोनिया विरुद्धको पाँच गोल गरेसँगै देशका लागि उनकाे गाेल संख्या ८६ पुगेकाे छ ।

राेनाल्डाे चम्कँदा पाेर्चुगलकाे शानदार जित

यता युइएफए नेसन्स लिग ए ग्रुप २ मा क्रिस्टियानाे राेनाल्डाे चम्कँदा पाेर्चुगलले शानदार जित हािसल गरेकाे छ । समूहको दोस्रो खेलमा पोर्चुगलले स्वीट्जरल्यान्डमाथि ४–० को सानदार जित दर्ता गरेको हो ।

लिस्वनमा आइतबार राति भएको खेलमा पोर्चुगलको फराकिलो जितमा रोनाल्डोले दुई तथा विलियम कार्भाल्हो र जोओ क्यान्सेलोले समान एक गोल गरे । पोर्चुगल पहिलो हाफमा ३–० ले अघि रहँदा दोस्रो हाफमा एक गोल थपेको थियो ।

राष्ट्रिय टोलीबाट ३७ वर्षीय रोनाल्डोको यो ११७औं अन्तर्राष्ट्रिय गोल हो । उनी राष्ट्रिय टोलीबाट सर्वाधिक गोल गर्ने खेलाडीसमेत हुन् । उनले गत वर्ष नै इरानका अली दाईको सर्वाधिक गोलको कीर्तिमानलाई तोडेका थिए ।

यो जितसँगै पोर्चुगल समूहमा शीर्षस्थानमा उक्लिएको छ । पोर्चुगलको २ खेलबाट ४ अंक पुगेको छ । समान ४ अंक नै रहेपनि चेक रिपब्लिक दोस्रो स्थानमा रहेको छ ।

यही समूहको अर्काे खेलमा चेक रिपब्लिक र स्पेनले २–२ गोलको बराबरी खेल्दै अंक बाँडेका छन् । चेकका जाुकव पेसिक र जान कुच्थाले गोल गर्दा स्पेनका पाब्लो गाभी र इनिगो मार्टिनेजले गोल गरेका थिए ।