काठमाडौं । काठमाडौं मेडिकल कलेज (केएमसी) को निःशुल्क स्वास्थ्य शिविरबाट ५१२ जना लाभान्वित भएका छन् । सिनामंगल स्थित केएमसीले काठमाडौं महानगरपालिका वडा नं. ३१ बासुकी मार्गको भ्याली पब्लिक स्कुलको प्राङ्गणमा आयोजित दन्त तथा आँखाको निःशुल्क स्वास्थ्य शिविर सञ्चालन गरेको हो ।

केएमसीका जेनेरल मेनेजर नारायण दाहालका अनुसार असार १५ र १६ गते भएको स्वास्थ्य शिविरमा ५५ जनाको दाँत खोलिएको थियो भने, ४४ जनालाई अस्पताल रेफर गरिएको थियो । शिविरमा केएमसीका दाँत तथा आँखाका चिकित्सकहरुले विद्यालयमा अध्ययनरत विद्यार्थीहरुको दाँत तथा आँखा परीक्षण गरेका थिए ।

केएमसीले दाँत तथा आँखाको सँगै सबै प्रकारको स्वास्थ्य सेवा प्रदान गर्न निःशुल्क स्वास्थ्य शिविरहरु चलाउने गरेको छ । ल्याव तथा विभिन्न स्वास्थ्य उपकरण सहितको स्वास्थ्य शिविरमा आएका मध्ये तत्काल उपचार गर्न नसकिने गम्भिर प्रकारका बिरामीहरुलाई उपचारार्थ अस्पताल रेफर गर्ने गरिएको छ ।

नोबेल शिक्षण असपतालका सञ्चालक डा. सुनिल शर्माले केएमसी लिएसँगै अस्पतालको स्वास्थ्य सेवालाई समुदाय केन्द्रीत बनाइएको छ । पछिल्ला डेढ वर्षयता केएमसीले उपत्यका तथा उपत्यकासँग जोडिएका विभिन्न जिल्लाहरुमा निःशुल्क स्वास्थ्य शिविर पठाएरै सर्वसाधारणको स्वास्थ्य जाँच गर्दै आएको छ ।

शिक्षा तथा स्वास्थ्य सेवामा आम जनताको सर्वसुलभ पहुँच पुर्याउन डा. शर्माले केएमसी र नोबेल शिक्षण अस्पतालको स्वास्थ्य सेवालाई गाउँ गाउँ प्र्याउने अभियान चलाई रहेका छन् ।