पाेखरा, ३० असार । नेपाल इन्जिनियर्स एशाेसिएसन गण्डकी प्रदेशले ६० औं इन्जिनियर दिवस सप्ताहव्यापी रूपमा मनाईरहेको छ । एशाेसिएसनले स्याङजा पुतलीबजारस्थित शीलता माध्यामिक विद्यालयमा शैक्षिक सामग्री वितरण गर्दै दिवस मनाउन सुरु गरेको हाे ।

गण्डकी प्रदेशका अध्यक्ष बृजेन्द्र केसीको अध्यक्षतामा भएको शैक्षिक सामग्री हस्तान्तरण सभामा पुनपा ५ का वडाध्यक्ष एवं विद्यालय व्यवस्थापन समितिका अध्यक्ष अर्जुन कुमार कार्कीले एशाेसिएसनले उदाहरणीय कार्य गरेको बताए ।

कार्यक्रममा एनइएका केन्द्रीय सदस्य ई. सागर भट्टराई, नेपाली कांग्रेसका महासमिति सदस्य ई. अनुप श्रेष्ठ, विद्यालयका प्रधानाध्यापक चिरन्जीवी लम्साल, एसिएन पेन्ट्स गण्डकी प्रदेश इन्चार्ज जीवन अधिकारी लगायतले बोलेका थिए ।
सचिव ई. अन्जन थापाको सञ्चालनमा रहेको शैक्षिक सामग्री हस्तान्तरण सभामा एशाेसिएसनका उपसभापति ई. सन्तोष जिसीले स्वागत मन्तव्य व्यक्त गरेका कार्यक्रम संयोजक अस्मिता खनालले जानकारी दिइन् ।

१ सय ३१ जना विद्यार्थी रहेको विद्यालयमा एशाेसिएसनले ४० दर्जन कपी, पेन्सिल, इरेजर र कटर वितरण गरेको थियो । भने, स्यानीटरी प्याड दुइ सय थान र ६० लिटर एसियन पेन्ट्स प्रदान गरेको सदस्य ई.विश्वास आचार्यले जानकारी दिए ।

एशाेसिएसनले इन्जिनियर समुदायबीच भाइचाराको विकास गराउने उद्देश्यले फुटसल प्रतियाेगिता, खुल्ला रक्तदान कार्यक्रम, वेदविद्याश्रममा खाद्यान्न वितरण, सरसफाई तथा प्रभातफेरी गर्दै साउन ३ गतेका दिन टेक्निकल कार्यपत्र प्रस्तुत गरेर दिवस मनाउन लागेको गण्डकी प्रदेशका सभापति बृजेन्द्र केसीले बताए ।

शैक्षिक सामग्री हस्तान्तरण सभामा पौवेगौडेस्थित ऐतिहासिक स्थल नुवाकोटको विकासको लागि आवश्यक डिपिआर तयार गर्न गण्डकी प्रदेश समिति तयार भएको अध्यक्ष केसीले बताए  ।