काठमाडौं, २ साउन । काठमाडौं मेडिकल कलेजको निःशुल्क स्वास्थ्य शिविरबाट ९५३ जना लाभान्वित भएका छन् । केएमसीले ललितपुरको संखपार्कमा आयोजना गरेको निःशुल्क स्वास्थ्य शिविरमा एकै दिन ९५३ जनाको स्वास्थ्य परीक्षण गरिएको हो ।

केएमसीका जनरल मेनेजर नारायण दाहालका अनुसार उक्त शिविरमा १४५ जनाको इसिजी गरिएको छ । २०७ जनाको ल्याव परीक्षण गरिँदा १९८ जनाको यूएसजी र ३५ जनाको दाँत खोलिएको छ । त्यस्तै निःशुल्क स्वास्थ्य शिविरमा स्वास्थ्य परीक्षण गर्दा ४२ जनालाई ओ.टी. रेफर गरिएको छ ।

हिमालयन इन्जिनियरिङ कलेजको सहकार्यमा गरिएको स्वास्थ्य शिविरले स्थानीय सर्वसाधारण नागरिकको स्वास्थ्य अवस्थाबारे जानकारी मिलेको छ । केएमसीले सामाजिक उत्तरदायित्व अन्तरगत गाउँगाउँमा निःशुल्क स्वास्थ्य शिविर सञ्चालन गर्दै आइरहेको छ ।

पछिल्लो समय पूर्वी नेपालमा नोबेल शिक्षण अस्पताल जस्तो प्रतिष्ठित स्वास्थ्य संस्था सञ्चालन गरेर नेपालको स्वास्थ्य शिक्षा र सेवामा योगदान पुर्याउँदै आएका डा. सुनिल शर्माले केएमसीको नेतृत्व लिएसँगै त्यहाँको स्वास्थ्य सेवामा ठूलो सुधार भइरहेको छ । डा. शर्माकै निर्देशनमा गाउँगाउँमा निःशुल्क स्वास्थ्य शिविर लिएर केएमसीका दक्ष चिकित्सकहरु पुगेका छन् ।