काठमाडौं, १३ साउन । काठमाडौं मेडिकल कलेज (केएमसी ले गरेको निःशुल्क स्वास्थ्य शिविरबाट ९६५ जना लाभान्वित भएका छन् । केएमसीले काठमाडौंको चन्द्रागिरी नगरपालिका वडा नं. १४ मा गरेको निःशुल्क स्वास्थ्य शिविरमा ९६५ जनाको निःशुल्क स्वास्थ्य परीक्षण गरिएको हो ।

केएमसीका जनरल मेनेजर नारायण दाहालका अनुसार उक्त स्वास्थ्य शिविरमा १७४ जनाको इसिजी, २०६ जनाको ल्याव तथा १९७ जनाको युएसजी गरिएको छ । यसैगरी, ३२ जनाको दाँत खोलिएको थियो भने ३४ जनालाई ओ.टी. रेफर गरिएको केएमसीले जनाएको छ ।

डा. सुनिल शर्माको नेतृत्वमा सञ्चालित केएमसीले आम जनतालाई सर्वसुलभ स्वास्थ्य सेवा प्रदान गर्न गाउँगाउँमा निःशुल्क स्वास्थ्य शिविर सञ्चालन गर्दै आइरहेको छ । विभिन्न कारणले स्वास्थ्य संस्थाको पहुँचमा पुग्न नसकेका नागरिकलाई गाउँगाउँ गएर स्वास्थ्य सेवा प्रदान गर्दा स्वस्थ नेपाल निर्माणको अभियानमा समेत टेवा पुग्ने समाजसेवी समेत रहेका डा. शर्माको भनाई छ ।

केएमसीले पछिल्लो समय निःशुल्क स्वास्थ्य शिविरसँगै अस्पतालको स्वास्थ्य सेवालाई उच्चस्तरीय समेत बनाउँदै गएको छ ।