काठमाडौं, २० साउन । स्पेनीस खेलाडी सेसर एज्पिलिक्वेटाले इंग्लिस क्लब चेल्सीसँग थप दुई वर्षको सम्झौता नविकरण गरेका छन् । चेल्सीका कप्तान समेत रहेका एज्पिलिक्वेटाले सन् २०२४ सम्म क्लब रहने निर्णय गरेका हुन् ।

राइट ब्याक एज्पिलिक्वेटा सन् २०१२ मा फ्रान्सेली क्लब मार्सलीबाट चेल्सीमा आएयता ४७६ खेलमा १७ गोल गरेका छन् । यसअघि उनी स्पेनिस महारथी बार्सिलोना जाने हल्ला चलेको थियो । चेल्सी रहँदा उनले प्रिमियर लिग, एफए कप, लिग कप, च्याम्पियन्स लिग, युइएफए सुपर कप र फिफा क्लब विश्वकप उपाधी जितेका छन् ।

यसैगरी चेल्सीले युवा मिडफिल्डर कार्ने चुकवेमेकालाई पनि अनुबन्ध गरेको छ । चेल्सीले एस्टन भिल्लाबाट २० मिलियन पाउन्डमा १८ वर्षीय मिडफिल्डर अनुबन्ध गरेको हो । युरोपमा अन्य क्लबले पनि इच्छा देखाएको प्रभावशाली चुकवेमेकालाई चेल्सीले ६ वर्षका लागि स्टाम्फोर्ड ब्रिज ल्याउन सफल भएको छ ।