सुनसरी, १६ भदौ । नेपाली कांग्रेस सुनसरीले आगामी मंसिर ४ गते हुन गइरहेको प्रतिनिधि तथा प्रदेशसभा निर्वाचन अन्तरगत प्रदेश १ को प्रदेशसभाका लागि सुनसरी क्षेत्र नं. २ (क) बाट नवोदिता चौधरीको नाम समावेश गरेको छ ।

सुनसरी क्षेत्र नं. २ (क) ले प्रतिनिधिसभा तथा प्रदेशसभा निर्वाचनका लागि उम्मेदवार सिफारिस गरेकोमा जिल्ला कमिटीले क्षमता योग्यताका आधार केलाउँदै नवोदिता चौधरीलाई सुनसरी क्षेत्र नं. २ (क) मा प्रत्यक्ष तर्फको निर्वाचन लड्न नाम समावेश गरेको हो । उनीसँगै नेपाल तरुण दल जिल्ला सभापति तथा कांग्रेस १ नं. प्रदेश सदस्य सिजन गुरुङको नाम समेत जिल्लाले समावेश गरेको छ ।

कांग्रेस जिल्ला कमिटीले महिला समावेशिताको सिद्धान्तलाई पछ्याउँदै प्रदेश १ सांसद समेत रहेकी चौधरीलाई प्रत्यक्षतर्फको निर्वाचनमा प्रतिष्पर्धा गर्न सिफारिस गरेको हो । बर्तमान १ नम्बर प्रदेश सभा सदस्य समेत रहेकी चौधरीले २०६४ सालको संविधानसभामा रहेर संविधान लेखनमा समेत महत्वपूर्ण योगदान पुर्याएकी थिइन् ।

पहिलो संविधान सभामा नेतृ चौधरीले संविधानको मस्यौदा समिति र सांस्कृतिक तथा सामाजिक ऐक्यबद्धता समितिको सभापति भएर काम गरेको अनुभव छ । साथै, नेतृ चौधरीले प्रदेशसभामा आएर पनि संघीयता कार्यान्वयनका चरणमा प्रदेशका ऐन कानुन निर्माण र समावेशिताका मुद्दाहरुमा महत्वपूर्ण भूमिका निर्वाह गरेकी छन् ।

नेतृ नवोदिता चौधरी आफैंमा शिक्षित र योग्य युवा नेतृ भएकाले जिल्लाले योपल्ट प्रत्यक्षमा उठाउने योजना बनाएको छ । अहिलेसम्म जिल्लामा कांग्रेसबाट प्रदेशसभामा प्रत्यक्ष निर्वाचन लड्ने आँट गर्ने उनी एउटै महिला हुन् । त्यसमाथि चौधरी आदिवासी जनजाति थारु समुदायको महिला भएकाले पनि अवसर दिनुपर्छ भन्ने आवाजहरु उठिरहेका छन् ।


क्षेत्रीय कमिटीले समानुपातिक तर्फ दिलकुमारी राई र वीरेन्द्र कार्कीको नाम सिफारिस गरेकोमा जिल्लाले शुशिला चौधरीको पनि नाम समावेश गरेको छ । यस्तै, प्रत्यक्षतर्फ सुनसरीका विवादास्पद व्यवसायी भीम पौडेल महाधिवेशन प्रतिनिधि विकास केसी तथा दोस्रो संविधानसभा सदस्यमा पराजित बनेका बद्रीनारायण चौधरीको नाम पनि क्षेत्रीय कमिटीले सिफारिस गरेको छ ।