विराटनगर, १५ पुस । मोरङ निर्वाचन क्षेत्र नं. ३ का सांसद डा. सुनिल शर्माले आफ्ना क्षेत्रका जनतालाई निःशुल्क स्वास्थ्य सेवा पुर्याउँदै आइरहेका छन् । सोही क्रममा नेपाली कांग्रेसका सांसद डा. शर्माले प्रत्येक शुक्रबार आफ्ना क्षेत्रका जनताका घरदैलोमा एम्बुलेन्स निःशुल्क स्वास्थ्य शिविरको पनि सुरु गरेकोमा आजको शिविर पथरी नगरपालिका वडा नं. ७ मा गरिएको छ ।

नोबेल शिक्षण अस्पताल मार्फत गरिएको निःशुल्क स्वास्थ्य शिविरमा १९५ जना बिरामीको स्वास्थ्य जाँच गरिएको नोबेलका अस्पताल प्रबन्धक नारायण दाहालले जानकारी दिए । स्वास्थ्य शिविरमा ३१ जनाको इसिजी, ४१ जनाको भिडियो एक्स–रे तथा ३७ जनाको ल्याब परीक्षण गरिएको छ । त्यस्तै, ५ जनाको दाँत खोलिएको नोबेलले जानकारी दिएको छ ।

एम्बुलेन्स क्याम्पमा जनरल मेडिसिन,  महिला रोग, नाक कान घाँटी, आँखा तथा दन्त रोगको स्वास्थ्य जाँच र इसिजी, ल्याब र भिडियो एक्सरे हुन्छ । स्वास्थ्य परीक्षणमा गम्भिर बिरामी फेला परे उनीहरुलाई बिराटनगर स्थित नोबेल शिक्षण अस्पतालमा उपचारका लागि पठाइन्छ । डा. शर्माले आफ्ना क्षेत्रका जनताका लागि भनेर प्रतिनिधि सभा सदस्यमा निर्वाचित भएको ७२ घन्टाभित्र नोबेलमा ५० शैयाको निःशुल्क क्याविन सेवा नै सुरु गरेका छन् ।

डा. शर्माले मोरङ क्षेत्र नं. ३ का जनतालाई शिक्षा, स्वास्थ्य जस्ता आधारभूत आवश्यक्ताबाट बञ्चित नगराउन व्यक्तिगत तवरले सुरु गरेको निःशुल्क स्वास्थ्य शिविर, उपचार सेवाले ग्रामिण क्षेत्रका विपन्न नागरिक, महिला तथा बालबालिका र जेष्ठ नागरिकले अधिकतम लाभ लिइरहेका छन् ।