काठमाडाैं । ठमेलस्थित एलओडी क्लबले सन् २०२६ का लागि विश्वकै उत्कृष्ट डिजे क्लबहरूको सूचीमा ४०औँ स्थान हासिल गरेको छ । यो सूची बेलायतस्थित प्रतिष्ठित म्यागजिन डिजे म्यागले हरेक वर्ष सार्वजनिक गर्दै आएको “उत्कृष्ट १०० क्लब” सूची हो ।

यस वर्ष विश्वभरका ५०० भन्दा बढी क्लबहरूबीच प्रतिस्पर्धा हुँदा एलओडीले आफ्नो स्थान अझ सुधार गर्दै ४४औँबाट ४०औँ स्थानमा उक्लिन सफल भएको हो । क्लबका निर्देशक भुपेन कुँवरका अनुसार यो उपलब्धि केवल क्लबको मात्र नभई नेपालकै अन्तर्राष्ट्रिय पहिचानसँग जोडिएको गौरवको विषय हो ।

उनले उल्लेख गरेअनुसार, यो सफलता टीमवर्क, सेवा गुणस्तर र निरन्तर नवप्रवर्तनको परिणाम हो । साथै, यसले नेपालको रात्रिकालीन जीवनशैली र पर्यटन प्रवर्द्धनमा महत्वपूर्ण योगदान पुर्‍याउने अपेक्षा गरिएको छ । अन्तर्राष्ट्रिय पर्यटक तथा क्लबप्रेमीहरूलाई नेपालतर्फ आकर्षित गर्ने सम्भावना पनि यसले बढाएको छ ।

पछिल्ला वर्षहरूमा एलओडी सन् २०२२ मा ५२औँ स्थान, २०२३ मा ४९औँ स्थान, २०२४ मा ५०औँ स्थान, २०२५मा ४४औँ स्थानमा परेकाे थियाे । यो निरन्तर प्रगतिले नेपालमा रात्रिकालीन मनोरञ्जन क्षेत्रको बढ्दो सम्भावना र स्तरलाई स्पष्ट रूपमा देखाएको छ ।