इनरुवा २३ चैत्र । सामाजिक सञ्जालमा बन्दुक सहित देखिएका दुई जनालाई सुनसरी प्रहरीले पक्राउ गरेको छ । जिल्ला प्रहरी कार्यालय सुनसरीका अनुसार हरीनगर गाउँपालिकाबाट बुधबार उनीहरुलाई अबेर पक्राउ गरिएको हो ।

केहिदिन अघि सुनसरी हरीनगर १ का अमर कुमार गुप्ताले इटालियन पेस्तोल जस्तो देखिने हतियार सहितको आफ्नो फोटो सामाजिक सञ्जालमा प्रकाशित गरेका थिए । त्यसपछि सुनसरीमा सुरक्षा थ्रेट बढेको चर्चा हुन थालेपछि सुनसरी प्रशासनले बुधबार अबेर गुप्तालाई पक्राउ गरेको हो ।

गुप्ता सँगै उनका सहयोगी सोहि गाउँपालिका वडा नम्बर २ का रोशन साहलाई  प्रहरीले पक्राउ गरेको छ । पक्राउ परेका गुप्ताले केहिदिन अघि एक समुदायलाई लक्षित गर्दै त्रास फैलाउन हतियार सहितको आफनो तस्वीर सञ्जालमा हालेपछि सुनसरी प्रशासनले उनी माथी निगरानी बढाएको थियो ।

उनी एक अन्तराष्ट्रिय जातीय संगठनसँग आबद्धा भई हरीनगरबाट नेपालमा आफ्नो गतिविधि गर्दै आएको आरोप समेत छ । जिल्ला प्रहरी कार्यालय सुनसरीका उप प्रमुख राजकुमार राईले घटनाको गहिरो अनुसन्धान थालिएको बताए ।

गुप्तालाई पक्राउ गरिएसँगै उनलाई छुटाउन र अनुसन्धान प्रभावित पार्न गिरोह समेत सक्रिय भइसकेको बताइन्छ । श्रोतका अनुसार सुनसरी प्रहरीले दवाबका बिच घटना अनुसन्धान गरीरहेकोले अनुसन्धान प्रभावित हुनसक्ने आशंका छ ।

जिल्ला प्रहरी प्रमुख प्रभु ढकालले मानिससहित फेला परेको हतियार हतियार जस्तो देखिएपनि खेलौना अर्थात लाइटर रहेको बताउँदै खेलौनाकै आधारमा उक्त व्यक्तिले अशान्ति फैलाएको बारे खोजी भइरहेको बताएका छन् । प्रहरी प्रमुख ढकालको यस्तो प्रतिकृया प्रति हरीनगरका केहि सर्वसाधारणले भने आशका ब्यक्त गरेका छन् ।

पक्राउ परेका गुप्ताबाट सक्कली हतियार परीवर्तन गरी नक्कली हतियार देखाएर  मुद्दा कमजोर पार्न खोजिएको आशंका छ । तर, यस्तो आरोप पुर्ण कपोलकल्पित रहेको प्रहरी प्रमुख ढकालको भनाई छ ।