काठमाडाैं, २४ बैशाख । आगामी मनसुन सिजनमा देशका अधिकांश स्थानहरुमा सरदर भन्दा कम वर्षा हुने जल तथा मौसम विज्ञान विभागले जनाएकाे छ ।

विभागले आगामी मनसुन सिजन (२०८० जेठ १८ देखि असोज १३) को जलवायुको आँकलन राष्ट्रिय मनसुन फोरम आयोजना गरी प्रतिवेदन सार्वजनिक गरेको हाे । प्रतिवेदन अनुसार आगामी मनसुन सिजनमा देशका अधिकांश स्थानहरुमा सरदर भन्दा कम वर्षा हुने सम्भावना ३५ प्रतिशत देखि ५५ प्रतिशत रहेको जनाएकाे छ ।

तथापि, कोशी प्रदेशका मध्य तथा उत्तर-पूर्वी भू-भाग, बागमती प्रदेशका दक्षिण-पूर्वी भू-भाग र मधेश प्रदेशका अधिकांश भू-भागमा सरदर वर्षा हुने सम्भावना ३५ प्रतिशतदेखि ४५ प्रतिशतसम्म रहेको छ ।

अधिकतम तापक्रम देशभर सरदर भन्दा बढी हुने सम्भावना ३५ प्रतिशत देखि ५५प्रतिशतसम्म रहेको विभागकाे भनाइ छ । त्यसैगरी न्यूनतम तापक्रम केहि स्थानमा सरदर र केहि स्थानमा सरदर भन्दा बढी हुने सम्भावना ३५ प्रतिशतदेखि ४५ प्रतिशतसम्म रहेको छ ।

धेरैजसो भू-भागमा न्यूनतम तापक्रम सरदर भन्दा बढी हुने सम्भावना ३५ प्रतिशतदेखि ४५प्रतिशत रहेको छ भने सुदुरपश्चिम प्रदेशका मध्य भू-भाग, कर्णाली प्रदेशका मध्य पश्चिमी भू-भाग, गण्डकी र बागमती प्रदेशका उत्तरी भू-भाग, लुम्विनी प्रदेशको पूर्वी तथा पश्चिमी भू-भाग र मधेश प्रदेशका पूर्वी भू-भागमा सरदर हुने सम्भावना ३५प्रतिशत देखि ४५प्रतिशत रहेको छ ।

यस्तै, आगामी जेठ १८ देखि असोज १३ सम्मको चार महिनाको मनसुन सिजनमा देशका अधिकांश स्थानहरुमा सरदर भन्दा कम वर्षा हुने सम्भावना रहेको बताइएकाे छ । यद्यपि, सरदर भन्दा कम वर्षा हुने सम्भावना स्थान विशेष फरक रहेको छ ।

कर्णाली प्रदेशका अधिकांश भू-भाग, गण्डकी प्रदेशका धेरैजसो भू-भाग,  सुदुरपश्चिम प्रदेशका मध्य तथा उत्तरका थोरै भू-भाग, लुम्बिनी प्रदेशका पश्चिमी तथा मध्य भू-भाग र कोशी प्रदेशका दक्षिणी भू-भागमा सरदर भन्दा कम वर्षा हुने सम्भावना ४५ प्रतिशत देखि ५५प्रतिशत रहेको छ ।

कोशी प्रदेशका पश्चिमी भू-भाग, बागमती प्रदेशका धेरैजसो भू-भाग, लुम्विनी प्रदेशका केहि भू-भाग र सुदुरपश्चिम प्रदेशका कञ्चनपुर, कैलाली, बैतडी तथा बझाङ लगायतका भू-भागमा सरदर भन्दा कम हुने सम्भावना ३५ प्रतिशत देखि ४५ प्रतिशत रहेको छ ।

कोशी प्रदेशका मध्य तथा उत्तर-पूर्वका थोरै भू-भाग, बागमती प्रदेशका दक्षिण-पूर्वी भू-भाग र मधेश प्रदेशका अधिकांश भू-भागमा सरदर वर्षा हुने ३५ प्रतिशत देखि ४५ प्रतिशत सम्भावना रहेको छ ।

विभागले याे वर्ष सुदुरपश्चिम प्रदेशका पूर्वी तथा दक्षिणी भू-भाग, लुम्विनी प्रदेशका पश्चिमी, उत्तरी तथा पूर्वी भू-भाग, गण्डकी प्रदेशका दक्षिणी तथा मध्य भू-भाग, बागमती प्रदेशका मध्य तथा दक्षिणी भू-भाग र मधेश प्रदेशका पश्चिमी भू-भागमा अधिकतम तापक्रम सरदर भन्दा बढी हुने सम्भावना रहेको जनाएकाे छ । ती क्षेत्रमा ४५ प्रतिशत देखि ५५ प्रतिशत सरदर तापक्रम भन्दा बढी हुने भनेकाे छ । बाँकी भू-भागमा सरदर भन्दा बढी हुने सम्भावना ३५ प्रतिशत देखि ४५ प्रतिशत रहेको छ ।

त्यस्तै, सुदुरपश्चिम प्रदेशका मध्य भू-भाग, कर्णाली प्रदेशका मध्य पश्चिमी भू-भाग, गण्डकी र बागमती प्रदेशका उत्तरी भू-भाग, लुम्विनी प्रदेशको पूर्वी तथा पश्चिमी भू-भाग र मधेश प्रदेशका पूर्वी भू-भागमा  न्यूनतम तापक्रम सरदर हुने सम्भावना ३५ प्रतिशि देखि ४५ प्रतिशत रहेको छ । बाँकी भू-भागमा सरदर भन्दा बढी हुने सम्भावना ३५ देखि ४५ प्रतिशत रहेको छ ।