काठमाडाैं, २६ बैशाख । नेपाल प्रहरीले भुटानी शरणार्थी प्रकरणमा थप दुई जनालाई पक्राउ गरेको छ । मंगलबार काठमाडौं उपत्यका अपराध अनुसन्धान कार्यालयको टोलीले थप दुई जनालाई पक्राउ गरेको हाे ।

प्रहरी उपरीक्षक (एसपी) रविन्द्र रेग्मीका अनुसार पक्राउ पर्नेमा रामशरण केसी र गोविन्द चौधरी छन् । केसी र चौधरीले नक्कली भुटानी शरणार्थी प्रकरणमा बिचौलियाको भूमिका खेलेको आरोप छ ।

प्रकरणमा प्रहरीले पूर्वगृहसचिव टेकनारायण पाण्डे, पूर्व गृहमन्त्री रामबहादुर थापा बादलका सुरक्षा सल्लाहकार इन्द्रजित राई, केशव दुलाल, सानु भण्डारी, सागर राई, सन्देश शर्मा, टंककुमार गुरूङ र नेकपा एमाले सचिव एवं सांसद टोपबहादुर रायमाझीका छोरा सन्दीपलाई पक्राउ गरिसकेको छ । सांसद टोपबहादुर रायमाझी भने फरार छन् ।

योसँगै प्रकरणमा पक्राउ पर्नेको संख्या १० पुगेको छ । फरार सांसद रायमाझीकाे घरमा जिल्ला प्रहरी परिसर काठमाडौंको टोलीले छापा मारेकाे थियाे । उनलाई प्रहरीले खोजी गर्न ७७ वटै जिल्लामा पत्राचार गरेको छ भने, केन्द्रीय अनुसन्धान ब्युरोले पनि उनको खोजी गर्न टोली परिचालन गरेको छ ।

प्रकरणमा पूर्वप्रधानमन्त्री तथा कांग्रेस सभापति शेरबहादुर देउवाका श्रीमती सांसद आरजु राणा, बालकृष्ण खाँडकी श्रीमती सांसद मञ्जु खाँडकाे समेत संलग्नताकाे आशंका गरिएकाे छ । सार्वजनिक एक अडियाेमा विचाैलियाले श्रीमती राणा र खाँडलाई क्रमशः २ कराेड र ६ कराेड बुझाएकाे जिकीर गरिएकाे छ ।

उक्त अडियाेबारे प्रहरीले छानविन गरिरहेकाे छ भने, सांसदद्वय राणा र खाँडले प्रकरणमा कुनै संलग्नता नरहेकाे प्रष्टिकरण दिइरहेका छन् ।