काठमाडाैं, ३१ बैशाख । शुभद्रा मदन फाउन्डेसनका मदन राईलाई थप सात दिन हिरासतमा राख्न अदालतले अनुमति दिएको छ । फाउन्डेसनमा बसेर पढ्ने बालिका र किशोरीहरूलाई यौन दुर्व्यवहार गर्ने गरेको आरोपमा  पक्राउ परेका राईलाई थप सात दिन हिरासतमा राखेर अनुसन्धान गर्न अदालतले अनुमति दिएको हाे ।

जिल्ला अदालत खोटाङले राईलाई सात दिन हिरासतमा राख्न आइतबार अनुमति दिएको जिल्ला प्रहरी कार्यालय खोटाङका प्रहरी नायब उपरीक्षक मञ्जील मुकारूङले जानकारी दिए ।

फाउन्डेशनका संस्थापक समेत रहेका राईलाई प्रहरीले गत शुक्रबार पक्राउ गरेको थियो । ७५ वर्षीय मदनले त्यहाँ बसेर अध्ययन गर्ने बालिका र किशाेरीहरूका संवेदनशील अंगमा हात हाल्ने, शारीरिक सम्पर्कका लागि आग्रह गर्ने, आफ्ना गोप्य अंगमा छुन लगाउने, नग्न शरीर देखाएर अश्लील हर्कत गर्ने गरेको आराेप छ ।

कृषि विज्ञका रूपमा परिचित राईको शुभद्रा मदन फाउन्डेसनमा बसेर पढ्ने बालिका र किशोरीहरूलाई यौन दुर्व्यवहार गर्ने गरेका तथ्यहरू सार्वजनिक भएका थिए । शुभम फाउन्डेसनले खोटाङको सामुदायिक स्कुल जनजागृति उच्च माध्यमिक विद्यालयकाे व्यवस्थापन र सञ्चालन गर्दै आएको छ ।