काठमाडाैं, ५ जेठ । सरकारले तीन तहका सरकारको कार्यात्मक सुदृढीकरण गरी कामको दोहोरोपन हटाउने घोषणा गरेको छ । आगामी आर्थिक वर्ष २०८०/०८१ को नीति तथा कार्यक्रम संघीय संसदको संयुक्त वैठकमा प्रस्तुत गर्दै राष्ट्रपति रामचन्द्र पौडेलले कार्यविस्तृतीकरण प्रतिवेदनको पुनरावलाेकन गरिने बताएका छन् ।

राष्ट्रिय समन्वय परिषद् लगायतलाई सक्रिय बताउने उनले बताएका छन् । राष्ट्रिय प्राथमिकताको काम गर्न तीनै तहका सरकारलाई नीतिगत र कानुनी व्यवस्था गरिने सरकारकाे याेजना छ ।

सरकारले बाराको निजगढ अन्तर्राष्ट्रिय विमानस्थल निर्माणको प्रक्रिया अगाडि बढाउने घोषणा गरेको छ । विमानस्थल निर्माणको प्रक्रिया अन्यौलमा रहेका बेला सरकारले यस्तो घोषणा गरेको हो ।

राष्ट्रपति पौडेलले प्रादेशिक विमानस्थलको अध्ययन गरी निर्माण कार्य अगाडि बढाउने, हवाई सेवालाई सुरक्षित बनाउन सुरक्षा मापदण्ड कडाइका साथ लागू गरिने, आन्तरिक तथा अन्तर्राष्ट्रिय विमानस्थलका टर्मिनल भवनको स्तरोन्नती गर्ने र निर्माण सम्पन्न भएका विमानस्थललाई पूर्ण क्षमतामा उपयोगमा ल्याउने बताए ।

न्यून आय भएका वर्ग र समुदायलाई लघुबीमाको दायरामा ल्याउने, देशभर बीमाको पहुँच पुर्‍याउने र कृषि बीमाको दायरा विस्तार गर्ने सरकारले याेजना बनाएकाे छ ।

सरकारले आगामी दुई वर्षभित्र ऊर्जालाई सबै नागरिकको पहुँचमा पुर्‍याउने पनि बताएकाे छ । दुई वर्षभित्र सबै नागरिक कहाँ विद्युत पुर्‍याउने याेजना छ ।

‘विपन्न वर्गलाई निःशुल्क विद्युतीय मिटर उपलब्ध गराइने, वर्षायाममा मासिक ५० युनिट र हिउँदयाममा मासिक ३० युनिटसम्म विद्युट खपत गर्ने उपभोक्तालाई निःशुल्क विद्युत उपलब्ध गराइने सरकारकाे नीति तथा कार्यक्रममा उल्लेख छ ।

सन् २०४५ भित्र शून्य कार्बन उत्सर्जन गर्ने सरकारको लक्ष्य रहेको छ । खनिज ऊर्जालाई स्वच्छ एवम् नवीकरणीय ऊर्जाले विस्थापन गरिने, हाइड्रोजन इन्धनको उत्पादन र उपयोगको सम्भाव्यता खोजिने, ऊर्जा मिश्रणनीति तय गरिने, ऊर्जा उत्पादनमा निजी क्षेत्रलाई प्रोत्साहित गरिने र विद्युत उत्पादन र प्रशारणलाई सामञ्जस्यता कायम गरिने भनिएकाे छ ।