काठमाडाैं, ७ जेठ । नक्कली भुटानी शरणार्थी प्रकरणमा दोषीलाई उम्काउने र निर्दोषलाई फसाउने प्रयास भइरहेको नेकपा एमालेका अध्यक्ष केपी शर्मा ओलीले जिकीर गरेका छन् । प्रकरणमा दाेषी उम्काउने निर्दाेष फसाउने कार्य स्वीकार्य नहुने पनि बताए ।

आफू परराष्ट्रमन्त्री भएकै बेला भुटानी शरणार्थीको तेस्रो मुलुक पुनर्वास कार्यक्रम सुरु भएको बताउँदै उनले त्यसबेला १ लाख १३ हजार ३०७ जना तेस्रो मुलुक गएपनि ६ हजार ७५५ बाँकी रहेको र उनीहरूमध्ये ४२९ को कार्ड बनिसकेको बताए ।

सरकारको नीति तथा कार्यक्रममाथि आइतबार संसदमा भएको छलफलमा बाेल्दै एमाले अध्यक्ष ओलीले आफू प्रधानमन्त्री भएको बेला बालकृष्ण पन्थी नेतृत्वमा समिति बनेको र त्यसले पठाएको प्रस्ताव हेर्न नभ्याएर होल्ड गरेको बताए ।

‘मुद्दैमुद्दा, नारैनारा, जुलूसै जुलूस, भित्तामा टाँसिदिन्छु भनेको छ, भुइँमा मिलाइदिन्छु भनेको छ । साँच्चै मिलाउँछन् कि क्या हो जस्तो स्थितिमा हामीले केही गरेनौं । त्यसपछि सरकारले अगाडि बढाउन फिर्ता पठाएछ ।’ प्रकरणमा त्यस बेलाकाे सरकारले केही निर्णय नगरेकाे भन्दै ओलीले आफूलाई कागजतिर हेर्ने समय पनि नभएकाे बताए ।

साथै, ओलीले त्यसपछि बनेकाे सरकारले तत्कालिन प्रतिवेदनमा ताेडमाेड गरेर नक्कली शरणार्थीका नाम राखेकाे जिकीर गरे । प्रकरणमा एमाले र आफ्नो नाम जोड्ने रहर गरेपनि सफल नहुने उनले बताए । ‘म चुनौतीका साथ भन्न चाहन्छु, म गृहमन्त्री भएँ, परराष्ट्रमन्त्री भएँ, प्रधानमन्त्री भएँ, छानबिन गरियोस् ।’ साथै उनले प्रकरणमा संलग्नकाे खाेजी गर्नु राज्यकाे काम भएकाे पनि बताए ।

प्रकरण छताछुल्ल भएपछि निर्दोष फसाउने प्रयास भइरहेको भन्दै उनले भने, ‘तथ्य प्रमाणसहित भन्दैछु, दोषीलाई उम्काउने प्रयास भइरहेको छ । निर्दोषलाई फसाउने कोसिस भइरहेको छ, यो बन्द गरियोस्, दोषीमाथि कारबाही दृढताका साथ अगाडि बढाओस् ।’ राजनीतिक अभीष्ट साध्न निर्दोषलाई फसाउनु पनि अपराध भएको ओलीले भने ।

यस्तै उनले प्रकरणमा सरकारले बाघ मारेको जसरी हल्ला गर्न जरूरी नभएको पनि बताए । गत वर्ष जेठ १९ कि २० गते उजुरी परेको भएपनि गुपचुप राखेको पाइएको दाबी गरे । ‘लेनदेन मिलाउने, केस दबाउने कोसिस भएछ, म सरकारमा थिइनँ, सरकारमा हुनेहरूले त्यतिसम्म गर्नुभएछ ।’ ९७५ जनासँग पैसा लिएर फारम भराएको भन्दै उनले पचाउन वा दबाउन सक्ने केस नभएको बताए । सरकारले भ्रष्टाचारविरोधी च्याम्पियन भएर केके न बाघ मारेको जस्तो उधुम हल्ला गरेको भन्दै ओलीले सरकारले जुँगामा ताउ लगाउनुपर्ने आवश्यकता नभएकाे पनि जिकीर गरे ।

प्रकरणमा संलग्नलाइ जाेगाउन नेताहरू र मन्त्रिपरिषदले हस्तक्षेप नगर्न र प्रहरीलाई निष्पक्ष छानबिन गर्न दिन आग्रह समेत गरे । ‘गल्ती गर्नेतिर सरकार नजाओस्, भ्रष्टलाई कारबाही गर्नेतिर जाओस् ।’ साथै यसअघि पनि केही मान्छे भुटानी शरणार्थी बनेर गएको सुनेको भन्दै ओलीले यसबारे छानबिन गर्न आग्रह गरे ।

ओलीले तीन दलका नेताहरूको भेटलाई लिएर प्रश्न उठेकाे प्रति उनले भने, ‘तीन प्रमुख पार्टीका नेताहरू भेट्दा सन्देह पैदा भयो ? संसद बैठक पटक पटक बस्दा सन्देह पैदा भयो ? मन्त्रिपरिषद् पटक पटक बस्दा सन्देह पैदा भयो ? के भन्या यो ?’

तीन जना भेट्दा पनि आफूले ‘मेरो मान्छे बचाइदेऊ भनेर म्याउँ म्याउँ गर्न गएको जसरी प्रचार भएको भन्दै चित्त दुखाए । ओली बाघ भएकाे तर्क गर्दै उनले बाघ भाेकै बस्छ तर, घाँस खाँदैन भने ।

प्रस्तावित नीति तथा कार्यक्रमले लोकतन्त्रप्रति सबैको विश्वास मजबुत बनाउने विस्तृत खाका नदिएको र सरकारप्रति विश्वास बढाउने कुनै कार्यक्रम दिन नसकेको ओलीकाे ठहर छ । न्याय र समृद्धिको योगफल नै लोकतन्त्र हो भन्दै ओलीले नीति तथा कार्यक्रममा लोकतन्त्रको आत्मा नरहेको टिप्पणी गरे ।