२२ भदौ २०८३, सोमवार
२२ भदौ २०८३, सोमवार
अबरूद्ध संसद सुचारू गर्न तीन ठूला दलहरू बालुवाटारमा
एक्सन खबर
काठमाडाैं, १३ जेठ । पशुपतिनाथमा चढाइएकाे सुनकाे जलहरीमा नेकपा एमालेका अध्यक्ष केपी शर्मा ओलीमाथि भ्रष्टाचार गरेकाे आराेप सत्तापक्षका सांसदले लगाएपछि अबरूद्ध बनेकाे संसद सुचारू गर्न तीन ठूला दलहरू छलफलमा जुटेका छन् ।
प्रधानमन्त्रीको सरकारी कार्यालय सिंहदरबारमा चलिरहेकाे छलफलमा एमालेको तर्फबाट अध्यक्ष केपी शर्मा ओली र प्रमुख सचेतक पदम गिरी सहभागी छन् । नेपाली कांग्रेसको तर्फबाट सभापति शेरबहादुर देउवासँगै उपसभापति पूर्णबहादुर खड्का र प्रमुख सचेतक रमेश लेखक उपस्थित छन् ।
माओवादी केन्द्रको तर्फबाट भने प्रधानमन्त्री पुष्पकमल दाहाल ‘प्रचण्ड’, वरिष्ठ उपाध्यक्ष नारायणकाजी श्रेष्ठ र प्रमुख सचेतक हितराज पाण्डे छलफलमा सहभागी छन् । आजै ४ बजे बस्ने संसदकाे बैठकमा कुनै अबरूद्ध नहाेस भनेर शीर्ष तीन दल छलफलमा बसेका हुन् ।
संसद् भवनमा आज दिउँसो ४ बजे बैठक बस्ने कार्यतालिका छ । शुक्रबारको बैठकमा एमालेले अवरोध गरेकोले आज बैठक अगाबै एमालेलाई सहमतिमा ल्याउने प्रयासस्वरुप शीर्ष तहमा छलफल भएको हो ।
शुक्रबार एमालेका सांसदले सुरूमै पशुपतिनाथ मन्दिरको गर्भगृहमा लगाइएको जलहरी सुन कि पित्तल भन्ने सरकारले स्पष्ट जवाफ नदिएसम्म सदन अघि बढ्न नदिने भन्दै बैठक अवरुद्ध गरेपछि बैठक स्थगित गरिएकाे थियाे ।
आजको बैठकमा प्रधानमन्त्री पुष्पकमल दाहाल प्रचण्डले नीति तथा कार्यक्रममाथि उठेका प्रश्नको जवाफ दिने कार्यसूची तय भएकोले बैठक कसैगरी सूचारू गर्नुपर्ने सत्ता पक्षलाइ दवाव छ ।
0 प्रतिकृया