काठमाडौं, १४ जेठ । संसद्मा उठेको शंकास्पद अनियमितताको अभिव्यक्तिलाई दलका शीर्ष नेता बसेर संसदको रेकर्डबाट हटाउने सहमति गर्नु विडम्बना भएको नेपाली कांग्रेसका नेता डा. शेखर कोइरालाले बताएका छन् । आज सामाजिक सञ्जालमा लेख्दै उनले सांसदका हरेक अभिव्यक्ति तार्किक निष्कर्षमा पुग्नुपर्ने उल्लेख गरे ।

डा. काेइरालाले पशुपतिनाथकाे सुनकाे जलहरी प्रकरणकाे विषयमा सत्तारूढ दलका सांसदले प्रतिनिधि सभामा दिएकाे अभिव्यक्ति हटाउन भएकाे सहमति गलत भएकाे जिकीर गरेका हुन् ।

‘कस्तो विडम्बना ! संसदमा कुनै माननीय सदस्यले कुनै शंकास्पद अनियमितता सम्बन्धी विषय उठाउने, दलका शीर्ष नेता बसेर त्यो अभिव्यक्ति संसदको रेकर्डबाट हटाउन सहमति गर्ने र संसद सचिवालयले सोही अनुरूप कार्य गर्ने,’ उनले लेखेका छन्, ‘सांसदका हरेक अभिव्यक्ति तार्किक निष्कर्षमा पुग्नुपर्नेमा त्यसो गर्न नदिंदैमा विगतका अनियमितता कति दिन ढाक्न सकिएला र ?’

उनले सांसदकाे गरिमा समेत कमजाेर हुँदै गएकाे बताएका छन् । ‘हामी हाम्रो सांसदको गरिमालाई कता लैजादैछौं । के हाम्रो संसद्ले संविधानले दिएको अधिकार स्वतन्त्र रुपमा उपभोग पनि गर्न नपाउने हो ? संसदको रेकर्डबाट त नेताका सहमतिमा केही कुरा हट्ला तर यो देशमा आम जनता, नागरिक समाज तथा संचार जगत पनि छन भन्ने कुरा बुझौं,’ डा. शेखरले भनेका छन् ।

माओवादीका सांसद लेखनाथ दाहालले पशुपतिनाथकाे मुर्तीमा सुन भनेर केपी शर्मा ओली सरकारले पित्तलको जलहरी हालेको आरोप लगाएपछि एमालेले गत शुक्रबार संसद् अवरुद्ध गरेको थियो ।

यसपछि हिजो शनिबार शीर्ष नेताहरुबीच सो अभिव्यक्ति रेकर्डबाट हटाउने सहमति भएसँगै अपरान्ह बसेकाे संसद बैठकमा सभामुखले उक्त अभिव्यक्तिकाे रेकर्ड हटाउन निर्देशन दिएका थिए ।