काठमाडाैं, १७ जेठ । भारतीय प्रधानमन्त्री नरेन्द्र माेदीकाे निमन्त्रणामा प्रधानमन्त्री पुष्पकमल दाहाल प्रचण्ड चारदिने भारत भ्रमणका लागि आज प्रस्थान गर्दैछन् । प्रधानमन्त्री प्रचण्डको सचिवालयले नेपाल एयरलाइन्सको नियमित उडानमार्फत् दिउँसो १ बजे भारत प्रस्थान गर्ने कार्यतालिका रहेको  जानकारी दिएकाे छ ।

मध्याह्न १२:२५ बजे त्रिभुवन विमानस्थलमा पत्रकार सम्मेलन गर्दै प्रचण्ड भारत प्रस्थान गर्ने कार्यतालिका छ । तेस्रोपटक प्रधानमन्त्री बनेपछिको यो उनको पहिलो विदेश भ्रमण हो ।

प्रधानमन्त्री प्रचण्ड दिउँसो २:२५ बजे दिल्ली अवतरण हुने र त्यहाँ उनलाई भारतका राज्यमन्त्री र विदेश मन्त्रालयका अधिकारीहरूले स्वागत गर्नेछन् ।त्यसपछि प्रधानमन्त्री सीधै होटल मौर्य प्रस्थान गर्नेछन् ।

हाेटलमा भारतका राष्ट्रिय सुरक्षा सल्लाहकार अजित डोभलसँग भेटघाट गर्ने कार्यतालिका रहेकाे छ । डोभलसँगको भेटघाटपछि प्रधानमन्त्री नेपाली राजदूतावासले आयोजना गरेको रात्रिभोजमा सरिक हुने र प्रवासी नेपालीहरूलाई सम्बोधन गर्ने कार्यक्रम तय गरिएको सचिवालयले जानकारी दिएकाे छ ।

प्रधानमन्त्री प्रचण्डकाे भारतीय प्रधानमन्त्री माेदीसँग भने भाेली बिहीबार मात्र भेटवार्ता हुनेछ । बिहीबार बिहान ११:०५ बजे प्रधानमन्त्री प्रचण्ड र भारतीय समकक्षी नरेन्द्र मोदीबीच भेटवार्ता हुने कार्यतालिका छ ।

त्यसअघि उनले राजघाटस्थिल महात्मा गान्धीको समाधिस्थल पुगेर पुष्पहार अर्पण गर्नेछन् । समकक्षी माेदीसँगकाे भेट लगत्तै केही परियोजनाको उद्घाटन हुने र पत्रकार सम्मेलनमा दुवै प्रधानन्त्रीले सम्बोधन गर्नेछन् ।

साेही दिन ४ बजे भारतका उपराष्ट्रपति जगदीप धनखडसँग शिष्टाचार भेट गर्ने कार्यक्रम छ । अपराह्न साढे चार बजे प्रधानमन्त्री प्रचण्डले भारतीय राष्ट्रपति द्रौपदी मुर्मूसँग समेत शिष्टाचार भेट गर्नेछन् ।

साथै, बिहीबार नै साँझ साढे पाँच बजे नेपाल, भारत दुवै देशका उद्योगी, व्यवसायीलाई सम्बोधन गर्ने कार्यक्रम तय गरिएको छ ।

तेस्रो दिन प्रधानमन्त्री प्रचण्डले मध्यप्रदेशको उज्जैनमा महाकालेश्वरको पूजाअर्चना गर्ने र इन्दोर प्रस्थान गर्ने कार्यसूची रहेको छ । त्यही दिन उनले मध्यप्रदेशका राज्यपालसँग पनि भेटघाट गर्नेछन् ।

भ्रमणको चौथो दिन अपराह्न ४:२० बजे दिल्लीबाट प्रधानमन्त्री प्रचण्डको स्वदेश फर्कने बताइएको छ । भ्रमण टोलीमा भौतिक पूर्वाधार तथा यातायातमन्त्री प्रकाश ज्वाला, ऊर्जा, जलस्रोत तथा सिञ्चाइमन्त्री शक्तिबहादुर बस्नेत, परराष्ट्रमन्त्री एनपी साउद, अर्थमन्त्री डा. प्रकाशशरण महत, उद्योगमन्त्री रमेश रिजाल रहेका छन् ।

त्यस्तै मुख्यसचिव शंकरदास वैरागीसहित ८ जना सचिवहरू तथा केही उद्याेगी, व्यवसायी र सञ्चारकर्मीहरू पनि भ्रमण टोलीमा रहेको बताइएको छ।