काठमाडाैं, १८ जेठ । पूर्वोत्तर भारतीय राज्य मणिपुरमा एक नेपालीभाषीको ज्यान गएको छ । तीन सातादेखि जारी हिंसात्मक आन्दोलनका क्रममा  रैथाने मणिपुरी र जनजाति कुकी समुदायबीचको हिंसामा परेर सेरोउ गाउँका नेपालीभाषी ५२ वर्षीय रोमनीकुमार पौडेलको मृत्यु भएको हो ।

गत सोमबार सेरोउमा मणिपुरी–कुकीबीच गोली हानाहान हुने क्रममा ज्यान जोगाउन भाग्दा क्रसफायरमा परेर उनको मृत्यु भएको पौडेलका ज्वाइँ लक्ष्मण अधिकारीले जानकारी दिए ।

सोमबारको भिडन्तमा केही सुरक्षाकर्मीसँगै ४० आन्दोलनकारी मारिएका थिए । मणिपुरी र कुकीले एकअर्काका हजारौं घर जलाएका छन् । हिंसात्मक आन्दोलनका क्रममा आन्दोलनकारी, सुरक्षाकर्मी र सर्वसाधारणसहित ८० बढीको ज्यान गइसकेको छ ।

मणिपुर भारतको संवेदनशील राज्य हो । त्यहाँ दर्जनौं उग्रवादी संगठन सक्रिय छन् । मणिपुरी र कुकीका अलग–अलग सशस्त्र गुट छन् ।