काठमाडौं, २९ जेठ । ‘विनियोजन विधेयक २०८० माथि विचार गरियोस्’ भन्ने प्रस्ताव बहुमतबाट स्वीकृत भएको छ । साेमबारकाे प्रतिनिधिसभा बैठकमा अर्थमन्त्री डा. प्रकाशशरण महतले पेश गरेकाे विनियोजन विधेयकमाथि प्रस्ताव बहुमतबाट पास भएकाे हाे ।

यही जेठ ३२ देखि असार १२ गतेसम्म विनियोजन विधेयकका विभिन्न मन्त्रालय र सचिवालय शीर्षकमाथि छलफलका लागि तोकिएको सभामुख देवराज घिमिरेले सदनलाई जानकारी गराएका छन् ।

विनियोजन विधेयकमाथिको सैद्धान्तिक छलफलमा सांसदहरुले उठाएका प्रश्नहरूको जवाफ दिँदै अर्थमन्त्री डा. महतले जनताको जीवनस्तर उकास्न, जनतालाई समृद्धि प्रदान गर्न, रोजगारी सिर्जना गर्न र उद्योग व्यवस्थाको प्रवर्धनका विषयलाई समेटेर बजेट विनियोजन गरिएकाे बताए ।

स्वास्थ्य, शिक्षा, पूर्वाधार, शान्तिसुरक्षा र सुशासन प्रवर्द्धन गर्नेतर्फ बजेट विनियाेजन गरिएकाे मन्त्री महतकाे भनाइ छ । स्वास्थ्य बीमा, विभिन्न गहन प्रकृतिका रोगको उपचार र पछि परेको क्षेत्रका लागि बजेट विनियोजन गरिएकाे दावी अर्थमन्त्रीकाे छ ।

तर, विधेयकमाथिको सैद्धान्तिक छलफलमा भाग लिँदै नेकपा (एमाले)का सांसदले आर्थिक हिसाबले पछि परेकालाई ठोस व्यवस्था नभएको बताउँदै उपचार नपाएर जीवन गुमाउने र शिक्षामा पहुँच पुर्या्उने विषयमा बजेटले ठाेस याेजना नबनाएकाे जिकीर गरे ।

राष्ट्रिय स्वतन्त्र पार्टीका सन्तोष परियारले राजनीतिक व्यवस्था बलियो बनाउने र अन्तर प्रदेशबीच समन्वय कायम गर्ने मामिलामा कमजोर रहेको तर्क गर्दा नेकपा एकीकृत समाजवादीका अम्बरबहादुर थापाले बजेट ठोस र परिणाममुखी नभई टालटुले हिसाबले बनेकाे जिकीर गरे ।

सत्तारूढ नेपाली कांग्रेसका सांसद विश्वप्रकाश शर्माले बजेटमा नवीनता र निरन्तरता भए पनि कार्यान्वयनको पक्षमा चुनाैति रहेकाे बताए । जसपाकी रञ्जुकुमारी झाले बजेटले धेरै पक्ष समेटेपनि गरिबीकाे रेखामुनि रहेका जनतालाई माथि उठाउने गरी कृषि, पर्यटन र ऊर्जा क्षेत्रको विकासमा कमजाेर रहेकाे चर्चा गरिन् ।