काठमाडौं, १ असार । प्रतिनिधिसभा नियमावलीको नियम १४८ को उपनियम ३ ले फौजदारी अभियोगमा पक्राउ परेको सांसद पुर्पक्षका लागि थुनामा गएमा सांसद पद स्वत निलम्बन हुने व्यवस्था अनुसार टोपबहादुर रायमाझी सांसद पदबाट निलम्बनमा परेका छन् ।

नक्कली भुटानी शरणार्थी प्रकरण पुर्पक्षका लागि थुनामा पठाएसँगै टोपबहादुर रायमाझीको सांसद पद गएको हाे । यसअघि एमालेले प्रकरणमा सचिव पदबाट रायमाझीलाई निलम्बन गरेकाे थियाे ।

नियमावली भनिएको छ, ‘प्रचलित कानूनबमोजिम तीन वर्ष वा सोभन्दा बढी कैदको सजाय हुने वा नैतिक पतन देखिने फौजदारी मुद्दामा अभियोगपत्र दायर भई निज पुर्पक्षको लागि थुनामा रहेकोमा त्यस्तो थुनामा रहेको अवधिभर वा अदालतको आदेशबमोजिम पुर्पक्षको लागि थुनामा बस्नुपर्नेमा त्यस्तो थुनामा नबसी फरार रहेको भएमा निजलाई सदस्यको हैसियतले कुनै कार्य गर्न वा कुनै अधिकार वा उन्मुक्ति प्राप्त हुनेछैन र त्यस्तो अवधिभर निज निलम्बनमा रहने र पारिश्रमिक, सेवा र सुविधा समेत स्थगित हुनेछ ।’

काठमाडाैं जिल्ला अदालतले शुक्रबार प्रकरणमा पक्राउ परेका १८ अभियुक्त मध्ये रायमाझीसहित १६ जनालाई पुर्पक्षका लागि थुनामा राख्न आदेश गरेको छ ।