काठमाडाैं, ७ असार । चार पटकको विश्वकप विजेता वेष्ट इन्डिजसँग १०१ रनले पराजित भए पनि नेपालले आईसीसी विश्वकप छनोटकाे सुपर सिक्समा पुग्ने संभावनालाई कायमै राखेकाे छ । दाेश्राे खेलमा अमेरिकालाई पराजित गरेपछि नेपालकाे सुपर सिक्समा पुग्ने संभावना कायमै रहेकाे हाे ।

बिहीबार विश्वकप विजेता राष्ट्रसँग पनि नेपालकाे खेल संयमित र सुधारिएकाे थियाे । नेपालले समूह चरणको अन्तिम खेलमा शनिबार नेदरल्यान्डससँग खेल्नेछ। सो खेलमा नेपालले जित दर्ता गरे सुपर सिक्समा पुग्ने प्रवल सम्भावना छ ।

वेष्ट इन्डिजले दिएको ३ सय ४१ रनको विशाल लक्ष्य पछ्याएको नेपालले अन्तिम ओभरकाे २ बल बाँकी रहँदा २ सय ३८ रन बनाएर अलआउट भयो । खेलमा वेस्ट इन्डिजका कप्तान साइ होप र निकाेलस पुरनकाे क्याच समाउन नसक्दा नेपाल पराजय उन्मुख भएकाे हाे । यदी यी दुइकाे क्याच विकेट किपरले समाएकाे भए खेलकाे स्वरूप नै चेन्ज हुन्थ्याे ।

खेलमा नेपालका लागि आशिफ शेखले सर्वाधिक ६३ रन बनाए । ९३ बलको सामना गरेका शेखले ४ चौका र १ छक्का प्रहार गरे । अर्का ब्याटस्म्यान गुलसन झाले ४२ र रोहित पौडेलले ३० बनाउँदा आशिफ शेखले २८ रन बनाए । दिपेन्द्र सिंह ऐरीले २३, करण केसी २८ रन बनाए । ललित राजवंशी शून्य रनमा नटआउट रहे । सन्दीप लामिछानेले १ तथा कुशल मल्लले २ रन बनाए ।

त्यसअघि नेपालले दोस्रो ओभरमा ओपनर कुशल भुर्तेललाई ५ रनमा गुमाउँदा पाँचौं ओभरमा भिम सार्कीलाई गुमायो । ७ बलमा २ रन बनाएका भिम जेसन होल्डरको बलमा विकेटकिपरको हातबाट क्याच आउट भए ।

त्यसअघि जिम्बावेको हरारे स्पोट्र्स क्लबमा नेपालले टस जितेर फिल्डिङ रोजेपछि ब्याटिङ गरेको वेष्ट इन्डिजले निर्धारित ५० ओभरमा ७ विकेटको क्षतिमा ३ सय ३९ रनको विशाल योगफल तयार पारेको थियो ।

खेलमा कप्तान होप र पुरनले दोहोरो शतकिय साझेदारी गरे । वेष्ट इन्डिजका लागि होप र पुरनले २८ ओभर ३ बलमा २ सय १६ रनको साझेदारी गरे । पुरनले १ सय १५ बलमा १० चौका र ४ छक्का मद्दतमा १ सय १५ रन बनाए । पुरनलाई दिपेन्द्र सिंह ऐरिले ४४ औं ओभरको अन्तिम बलमा क्लिन एण्ड बोल्ड गरे ।

कप्तान होप १२९ बलमा १० चौका र ३ छक्का हान्दै १ सय ३२ रनमा भिम सार्कीको हातबाट क्याच आउट भए । दोस्रो ओभरको तेस्रो बलमा करण केसीले काइल मेयर्सलाई क्याच आउट गराए । चौथो ओभरको पहिलो बलमा गुल्सन झाले जोनसन चार्ल्सलाई १ रनमा आउट गराए ।

सन्दीप लामिछानेले १६ औं ओभरको तेस्रो बलमा ४२ बलमा २ चौका र २ छक्का हान्दै ३२ रन बनाएका ब्रान्डोन किङलाई बोल्ड आउट गर्दा रोभम्यान पावेल २९ रनमा ललित राजवंशीको बलमा गुलसन झाको हातबाट क्याच आउट भए । किमो पल १ ललित राजवंशीको बलमा बोल्ड आउट भए ।

ललित राजवंशीले १० ओभरमा मात्र ५२ रन दिएर तिन विकेट लिए ।गुलसन झाले ८ ओभरमा ६४ रन दिएर १ विकेट लिए । सन्दीप लामिछानेले आफ्नो स्पेलमा १ मेडन राख्दै ५० रन दिएर १ विकेट लिए । करण केसीले १० ओभरमा १ मेडन राख्दै ८१ रन दिएर १ विकेट लिए । आरिफ शेखले ४ ओभरमा ३३ र कुशल मल्लले १ ओभरमा ८ रन, दिपेन्द्र सिंह ऐरीले ७ ओभरमा ४५ रन दिएर १ विकेट लिए ।

पहिलो खेलमा जिम्बावेसँग ८ विकेटले पराजित नेपालले दाेश्राे खेलमा अमेरिकालाई ६ विकेटले हराएको थियो । अमेरिका समूह ए बाट लगातार तीन हारको साथ बाहिरिएको अवस्थामा अब नेपालले सुपर सिक्समा पुग्न शनिबार नेदरल्यान्ड्सलाई हराएर मात्र हुँदैन नेदरल्यान्ड्स अन्तिम खेलमा वेस्ट इन्डिजसँग हार्नुपर्ने हुन्छ ।