काठमाडौं, २६ साउन । क्विन्टल सुन प्रकरणमा गृहमन्त्री र अर्थमन्त्रीले नैतिक जिम्मेवारी लिएर राजीनामा दिनुपर्ने माग गर्दै संसदमै आमरण अनसन बस्ने घाेषणा गरेका नेपाली कांग्रेसका सांसद सुनिल कुमार शर्मालाई प्रहरीले पक्राउ गरेकाे प्रति नेकपा एमालेका सांसदले आपत्ति जनाएका छन् ।

शुक्रबार प्रतिनिधि सभामा एमालेको तर्फबाट बोल्दै सांसद ज्वालाकुमारी साहले कांग्रेस सांसद शर्माको पक्राउप्रति आपत्ति जनाउँदै सुन काण्डमा उच्चस्तरीय छानविन समिति गठन हुनुपर्ने आवाज उठाएकालाई पक्राउ गरिएकाेमा विराेध जनाइन् । ‘नेपाली कांग्रेसको माननीय सुनिल शर्माजीलाई जो सुन काण्ड प्रकरणमा भ्रष्टाचारीलाई पटक-पटक उच्चस्तरीय छानबिन आयोग गठन हुनुपर्छ भन्ने आवाज उठाइरहेको व्यक्तिलाई आज कुन हिसावबाट समातिएको छ ?’ उनले प्रश्न गरिन् ।

म्याद सकिइसकेको विषयमा बखेडा झिकेर शर्मालाइ पक्राउ गरिएको भन्दै सांसद साहले संसदमा भनिन् ‘यो कानुनले पनि मिल्दैन् । र उहिले नै म्याद सकिएको प्रमाणपत्रलाई अहिले बखेडा झिकेर जो समातिएको छ यसको घोर आपत्ति गर्न चाहन्छु ।’

उनले सुन काण्डमा उच्चस्तरीय छानविन समिति गठन नगरी सरकारले आफु बच्ने दाउ गरेकाे बताउँदै छानविन समिति गठन गरेर गृहमन्त्री र अर्थमन्त्रीलाई समेत छानविनकाे दायरामा ल्याइनु पर्ने माग गरिन् ।

हिजाे शर्मालाई नक्कली शैक्षिक प्रमाणपत्र लिएको आरोपमा नेपाल प्रहरीको केन्द्रीय अनुसन्धान ब्युरो (सीआईबी)ले पक्राउ गरेको छ । उनीसँगै प्रहरीले अहिलेसम्म ८ जनालाई पक्राउ गरिसकेकाे छ ।