काठमाडौं, २६ साउन । नेपाली कांग्रेसका सांसद डा. सुनिलकुमार शर्मा साधारण तारेखमा रिहा भएका छन् । काठमाडौं जिल्ला अदालतले सांसद शर्मालाई साधारण तारेखमा छाड्न आदेश दिएको हो । अदालतले डा. शर्मालाई थुनामा राख्नुपर्ने कारण नदेखिएको भन्दै थुना बाहिरै राखेर अनुसन्धान गर्न सिआइविलाई आदेश दिएको हो ।

सिआइवीले बिहीबार सांसद शर्मालाई लिखत सम्बन्धी विषयमा उनको निवासबाटै पक्राउ गरेको थियो । क्विन्टल सुन प्रकरणमा गृहमन्त्री र अर्थमन्त्रीले राजीनामा दिनुपर्ने अडान राख्दै आएका डा. शर्मालाई सोही प्रकरणमा प्रतिसोध साँधिएको भन्दै कांग्रेस, एमालेका सांसदहरुले समेत विरोध जनाएका थिए । उक्त प्रकरणमा सांसद शर्माले संसदमा आमरण अनसन नै बस्ने घोषणा गरेका थिए ।

कांग्रेस संसदीय दलमा बोल्ने अधिकांश सांसदहरुले डा. शर्माको पक्राउ प्रतिसोधपूर्ण रहेको बताएका थिए । उनीहरुले यस बारेमा अब गृहमन्त्री र अर्थमन्त्रीले संसदमा जवाफ दिनुपर्ने बताएका छन् । प्रकरणमा अदालतले अन्य अभियुक्तविरुद्ध अनुसन्धान गर्न सिआइवीलाई ५ दिनको म्याद दिएको छ ।