काठमाडाैं, १ भदाै । नेकपा एमालेले केन्द्रीय नेताहरूको जिम्मेवारी हेरफेर गरेको छ । शुक्रबार अन्तरपार्टी निर्देशन 'अपानि' जारी गर्दै एमालेले केन्द्रीय कार्यालयको व्यवस्थापनमा रहेको बागमती प्रदेशको इन्चार्ज गुरू बराललाई तोकेको छ ।

एमाले संसदीय विभागमा पनि सदस्यहरू मनाेनय गरिएकाे छ । पृथ्वी सुब्बा गुरूङ प्रमुख रहेकाे विभागमा भगबती चाैधरी, सुनिता बराल, अम्बर रायमाझी, तारा लामा तामाङ लगायतलाई मनाेनयन गरिएकाे छ ।

काठमाडौं महानगरपालिकाका पूर्वमेयर विद्यासुन्दर शाक्यलाई काठमाडौंको तारकेश्वर नगरपालिका र टोखा नगरपालिकाको इन्चार्ज बनाएकाे छ । सामाजिक सेवा विभागको प्रमुखमा झपटबहादुर बोहरालाई बनाउँदा कर्णाली प्रदेश कमिटीको सचिव रहेका कमल शाहीलाई जिम्मेवारीबाट हटाएर उपसचिव टेकराज पछाईलाई मनोनयन गरिएको अन्तर पार्टी निर्देशनमा उल्लेख छ ।

यस्तै, दीपकप्रकाश भट्टले अर्थयोजना विभागको सचिवबाट र सोभियत ढकालले विपद व्यवस्थापन तथा स्वयंसेवा विभागको सचिवबाट बिदा भएर भूगोलमै काम गर्न चाहेकाले उनीहरूलाई बिदा दिइएको छ ।

मञ्चमा पुष्पलाल, मदन, मनमोहन र अध्यक्ष ओलीको फोटो

एमालेले जनसंगठनका कार्यक्रममा जीवित नेतामध्ये पार्टी अध्यक्ष केपी ओलीको मात्रै फोटो मञ्चमा राख्न भनेको छ । कार्यक्रमको गरिमा र मर्यादा बढाउन अबदेखि पार्टी र जनसंगठनले आयोजना गर्ने सार्वजनिक कार्यक्रममा तीन अग्रज नेताहरू, संस्थापक महासचिव पुष्पलाल, जननेता मदन भण्डारी र पूर्वअध्यक्ष मनमोहन अधिकारीका अतिरिक्त पार्टी अध्यक्षबाहेक अरूको फोटो प्रयोग नगर्ने निर्णय गरेको उल्लेख छ ।

कार्यक्रमको मञ्च वक्ताले मात्र प्रयोग गर्ने गरी अतिथि र वक्ताहरूलाई दर्शकदीर्घामा नै मर्यादित ढंगले आसनको व्यवस्था मिलाउन एमालेले अपानीमा भनेकाे छ ।

यस्तै, एमालेले कार्यक्रम सुरू भएपछि अन्त्य नहुँदासम्म आसन ग्रहणको उद्घोषण गरिरहने परम्परा अन्त्य गर्ने निर्णय गरेको बताएको छ ।कार्यक्रममा ब्याज, माला र खादाको अनावश्यक प्रयोग नगर्न र कार्यक्रमलाई भड्किलो नबनाउन समेत एमालेले निर्देशन दिएको छ ।

त्यस्तै एमालेले सामाजिक सञ्जालमा अनधिकृत र अज्ञात व्यक्तिहरूबाट पार्टीको नाम, लोगो र झन्डा दुरूपयोग भइरहेकोतर्फ पनि सचेत गराएको छ। पार्टीपंक्ति तथा समाजमा भ्रम सिर्जना गरेको भन्दै पार्टी र पार्टी नेतृत्वसँग जोडेर बनाइएका फेक-एकाउन्ट बन्द गर्ने पहलका लागि केन्द्रीय प्रचार तथा प्रकाशन विभागलाई निर्देशन दिइएको छ ।

दुई केन्द्रीय सदस्य पदमुक्त, चार जनालाई बिदा

एमालेले पार्टीका दुई केन्द्रीय सदस्य पदमुक्त भएको र चार जनाले बिदा लिएको बताएको छ । काठमाडौं महानगरपालिकाका मेयरका प्रत्यासी केशव स्थापित र सिराहका प्रमोदनारायण यादवले केन्द्रीय सदस्यको जिम्मेवारीबाट अलग हुन चाहेकाले पदमुक्त गरेको छ ।

अजय क्रान्ति शाक्य (काठमाडौं), जुनेली श्रेष्ठ (मकवानपुर), पार्वती रावल (चितवन), पुरनसिंह दयाल (बैतडी) लाई बिदा दिइएको छ । स्वास्थ्यका कारण पार्टीमा सक्रिय हुन नसकेको जानकारी गराएर बिदा माग गरेकाले सोही अनुरूप स्वीकृत गरिएको हाे ।

यस्तै, लामो समयदेखि पार्टीको काममा संलग्न नभएका अन्य केही नेताहरूको हकमा अवस्था र कारण बुझेर आगामी बैठकमा आवश्यक निर्णय लिने भनिएकाे छ । गत सोमबार बसेको एमाले सचिवालय बैठकले स्थायी कमिटी सदस्य मणि थापासँग सोधपुछ गर्ने निर्णय गरेकोमा यसबारे केही नखुलाइकन अर्को बैठकले निर्णय गर्ने भनिएको छ ।