काठमाडौं, १० भदाै । दुई पूर्वप्रधानमन्त्रीलाई उन्मुक्ति दिँदै बहुचर्चित  ललिता निवास परिसरको सरकारी जग्गा हिनामिना प्रकरणमा २९० जनाविरूद्ध किर्तेमा मुद्दा दायर गरिएकाे छ । प्रहरीको केन्द्रीय अनुसन्धान ब्युरोले २८६ जनाविरुद्ध किर्ते र संगठित अपराधमा मुद्दा चलाउन राय दिएपनि जिल्ला सरकारी वकिलकाे कार्यालयले संगठित अपराधमा मुद्दा चलाउन प्रमाण नपुग्ने भन्दै सरकारी कागजात किर्तेमा मात्र मुद्दा दायर गरेकाे हाे ।

सरकारी वकिलकाे कार्यालयले प्रकरणमा बहालवाला सचिव कृष्णबहादुर राउत, सहसचिव सुशील वैद्य, पूर्वउपप्रधानमन्त्री विजयकुमार गच्छदारसमेत चार पूर्वमन्त्री, ६ पूर्वसचिवसहित २९० जनाविरुद्ध जिल्ला अदालत काठमाडौंमा मुद्दा दायर गरेकाे छ । सिआइबीले प्रतिवेदनमा पूर्वप्रधानमन्त्री नेपाल र भट्टराईलाई साक्षीका रूपमा पेश गरेकोले उनीहरू उम्किएका छन् ।

काठमाडौं जिल्ला अदालतका सूचना अधिकारी दीपक दाहालले उनीहरूमाथि किर्तेमा मुद्दा दायर भएको जानकारी दिए । जिल्ला सरकारी वकिलको कार्यालयले आइतबार अभियोजन गर्ने निर्णय गरी अदालत गएको हो ।

प्रहरीको केन्द्रीय अनुसन्धान ब्युरोले २८६ जनाविरुद्ध किर्ते र संगठित अपराधमा मुद्दा चलाउन राय दिएमा संगठित अपराधमा प्रमाण नपुग्ने भन्दै सरकारी वकिल कार्यालयले किर्तेमा मात्र मुद्दा चलाउने निर्णय गरेको हो ।

प्रकरणमा किर्ते गर्ने सर्वसाधारणलाई १ वर्ष कैद र मन्त्री, सचिवलगायत सरकारी कर्मचारीलाई थप दुई वर्ष सजाय माग गरिएको छ । मुद्दा चलाइएका मन्त्रीहरूमा पूर्वउपप्रधान तथा भौतिक योजना मन्त्री गच्छदार, पूर्वभूमि सुधार मन्त्री चन्द्रदेव जोशी, पूर्वभूमि सुधार मन्त्री डम्बर श्रेष्ठ र पूर्वराज्यमन्त्री सञ्जयकुमार शाह छन् ।