काठमाडौं, २५ भदौ । हृदयघातबाट नेकपा एमालेका उपाध्यक्ष सुवासचन्द्र नेम्वाङको निधन भएको छ । नेकपा एमाले संसदीय दलको उपनेता नेम्वाङलाई राति १ बजे तिर त्रिवि शिक्षण अस्पताल, महाराजगञ्ज पुर्‍याइएको थियो । चिकित्सकहरुले अस्पतालमा पुर्‍याउने वित्तिकै नेम्वाङको निधन भएको घोषणा गरेका थिए ।

साेमबार विहानैदेखि ज्वराे आएर घरमै आराम गरिरहेका नेम्वाङ आइतबार धरानकाे एक कार्यक्रममा सहभागी भएका थिए । साेमबार चिकित्सकले नेम्वाङकाे घरमै पुगेर स्वास्थ्य जाँच गरेका थिए ।

पूर्वसभामुख समेत रहेका नेम्वाङ २०५६ सालयता इलामबाट लगातार चुनाव जित्ने नेतामा पर्दछन् । इलाम, सुन्तलाबारमा जन्मिएका नेम्वाङ इलाम क्याम्पस, अनेरास्ववियुमा लागेर २०२९ सालमा कम्युनिस्ट राजनीतिमा आएका थिए । २०३३ सालमा राजद्रोह मुद्दामा केही समय जेल परेका नेम्वाङ २०४८ र २०५२ सालमा राष्ट्रिय सभाको सदस्य भएका थिए ।

मनमोहन अधिकारी नेतृत्वको पहिलो कम्युनिस्ट सरकारमा कानुन, न्याय तथा संसदीय व्यवस्था मन्त्री भएका नेम्वाङ २०५६ को निर्वाचन जितेर संसदकाे सार्वजनिक लेखा समिति सभापति बनेका थिए । तत्कालीन प्रधानमन्त्री गिरिजाप्रसाद कोइराला तथा पर्यटन तथा नागरिक उड्डयन मन्त्री तारिणीदत्त चटौत जोडिएको चर्चित लाउडा कान्ड छानबिन गरेर चर्चामा आएका उनी जनआन्दोलन २०६२–६३ सँगै पुनर्स्थापित संसदका सभामुख बनेका थिए ।

२०६४ र २०७० मा इलामबाट चुनाव जितेर संविधानसभाको अध्यक्ष भएका नेम्वाङ चारपल्ट सभामुख बन्दा सधैं सर्वसम्मत भएका थिए । नेम्वाङका २ छाेरा, २ छाेरी र श्रीमती छन् । दुइ छाेराहरू अस्ट्रेलिया र बेलायत रहेकाले उनकाे अन्तिम संस्कार भाेली हुने भनिएकाे छ ।

नेकपा एमालेले नेम्वाङको पार्थिव शरीर श्रद्धाञ्जलीका मंगलबार ९ बजेदेखि पार्टी कार्यालय च्यासलमा राख्ने जनाएको छ । नेम्वाङलाई नेपाली राजनीतिमा शान्त स्वभावका, कसैलाई नबिझाउने नेताका रूपमा चिनिन्छ ।